Yashyizweho kuri 1 August, 2016 | 09:12

Rweru: Abimuwe Mazane na Sharita barataka inzara

Nyuma y’ukwezi bimuwe abimuwe Mazane na Sharita bagatuzwa mu midugudu y’icyitegererezo barataka inzara. Ibi babivugira ko ibiryo bahawe bitangiye kubashirana ndetse n’amasambu bahawe igihe cyo guhinga kikaba kitaragera ngo bayahinge abashe kubatunga.

Babifashe nko kubonekerwa, bakimara gutuzwa mu nzu z’akataraboneka basanzemo amashanyarazi, amazi n’ibindi bikoresho bya kijyambere. N’ubwo akanyamuneza kari kose bakihatuzwa aho mu kagali ka Batima, umurenge wa rweru, akarere ka Bugesera, ngo kuri ubu, nk’uko bamwe muri bo babyivugira, inzara iravuza ubuhuha kuko ibyo kurya bahawe byashize. Ibi bibaye nyuma y’igihe kitagera ku kwezi aho batuye hatashywe ku mugaragaro na Perezida wa repubulika dore ko hatashywe ku wa 4 Nyakanga 2016.

Ibiribwa bitangiye kubashirana

Intero ni imwe bati “Mbere y’uko Perezida adusura buri muryango bawuhaye ibiro 25 by’akawunga, n’umuceli, ibiro 10 by’ibishyimbo hamwe n’amavuta yo guteka.
Hashize iminsi irenga 25 babiduhaye, ariko ndakubwiza ukuri ko byashize rwose, ubu inzara iratwugarije.” Ayo ni yo magambo usanganizwa na bake barimo iyo ugize amahirwe bakemera kukubwira uko babayeho.

Nk’uko bakomeza babivuga ngo ntibarahabwa imirima yo guhinga. Umwe ati “Batubwiye ko bazaduha imirima yo guhinga, ariko twibaza igihe bazayiduhera kuko ubu abafite imirima bari kuyihinga kugira ngo imvura nigwa bazahite batera. Twabwiwe ko buri muntu bazamuha intambwe 55 z’uburebure hamwe n’ubugari bungana n’intambwe 40.” Nyamara ariko bemeza ko ubuyobozi bwabijeje ko bazahabwa ubufasha butandukanye burimo ibyo kurya, ubwatsi bw’amatungo n’ibindi mu gihe cy’amezi atandatu yashira bagatangira gutungwa n’imirimo y’amaboko yabo.

Umunyamabanga Nshingwabikorwa w’Umurenge wa Rweru, Rwabuhihi Jean Christophe, yagize ati “Twirinze kubahera ibiryo byose rimwe kugira ngo batabipfusha ubusa, ubwo ibyo bahawe byashize turongera tubahe ibindi. Ikindi kandi bimutse bafite ibiribwa bari bajeje aho bari batuye, hari n’abandi basubirayo gusarura ibyo basize bahinze.”

Kota akazuba no kuryama

Ubu abagabo, abagore ndetse n’abana babyuka bicaye ku rubaraza rw’amazu yabo kubera kubura icyo bakora. Babyuka bota akazuba, ubundi bamara kurya bakigira mu buriri. Umwe muri bo ati “Kubona umuntu w’umugabo abyuka yota izuba hamwe n’abana n’umugore ni ibintu bidutera agahinda[…]iyo turushye nyine tujya kuryama ubwo nawe ibindi urabyumva.”

Aba baturage basaga igihumbi, bimuwe ku birwa ku mpamvu z’umutekano ndetse no kugira ngo byorohe kugezwaho ibikorwa by’amajyambere. Bari mu mazu meza aho hari aho inzu zimwe zigabanijemo ibice bijyamo imiryango ibiri, n’andi inzu imwe ijyamo imiryango itatu ariko aho iba haba hatandukanye nataho ihurira.

PAX PRESS


Tanga igitecyerezo

Who are you?