Yashyizweho kuri 5 July, 2018 | 08:02

Rugarama: Kutumva neza ihame ry’ uburinganire bituma batita ku nshingano z’ urugo

Abagore bamwe na bamwe bo mu murenge wa Rugarama mu karere ka Gatsibo bashinjwa n’abagabo babo ko batitabira bihagije inshingano z’ingo zabo. ngo ntibumva kutumva neza ihame ry’ uburinganire, akaba ariyo ntandaro y’amakimbirane.

Abagabo bamwe na bamwe bo mu murenge wa Gatsibo ntibishimiye imyifatire y’abagore babo kubera ko batacyuzuza inshingano zabo neza z’urugo, bitwaje amahame y’uburinganire u Rwanda rugenderaho. Bamwe mu bagore batinda mu tubari kuko biyumvisha kugira uburenganzira bwo kwisanzura. Urugero rwa bamwe mu bagore bagorobereza mu tubari, rutangwa na Habarurema Faustin. Uyu muhinzi wo mu kagari ka Gihuta avuga ko umugore we yigira mu gasanteri kwinywera inzoga agataha nka saa sita z’ ijoro, mu gihe we, aba ari mu rugo amutegereje. Yagize ati ”Umugore wanjye akora ibyo yishakiye! Iyo ngize icyo mubaza, ansubiza muri aya magambo. Si uburinganire se? Natwe dufite ijambo, kandi tugomba gukora ibyo dushaka. Ubwo rero iyo bigenze gutyo, ndatuza ngacisha make.”

Iki kibazo cyagarutsweho na Bangamwabo Pascal. Nawe avuga ko ubwumvikane mu miryango imwe n’ imwe bugoye kubera ko abagore bamwe na bamwe bumva ko bafite uburenganzira n’ububasha bwo kwishyira no kwizana igihe aricyo cyose. Ahamya ko amakimbirane akigaragara mu kagari ka Gihuta, akenshi aturuka ku bagore bataha bwije, kandi basinze. Yagize ati " Mu baturanyi banjye, bakunda gutongana no kurwana bitewe nuko abagore bataha bwije. Baba bataye ingo zabo n’urubyaro rwabo. Benshi baba basinze, kandi ntawagira icyo avuga kuko bitwaza uburinganire. "

Ubuhamya bw’abagore

Abagore bamwe batuye muri uwo murenge bemeza ko bamwe muri bo, bigize ba ruharwa bitewe no kutumva neza ihame ry’ uburinganire. Ingaruka ni nyinshi nko tutita ku miryango yabo. Musabyimana Mariam, umusilamukazi uri mu kigero cy’imyaka 50, avuga ko abagore bumvise nabi ihame ry’ uburinganire.Ati ” Ino aha muri aka gace, abagore bamwe bumva ko bahawe ijambo bikabaha umwanya wo kwitwara uko bishakiye. Aho kugira ngo bafatanye nabo bashakanye mu kwiteza imbere, birirwa mu tubari, bagataha igihe bashakiye. Ibi rero usanga biteye ikibazo muri uyu murenge.”

Batamuliza Rose nawe atuye mu kagari ka Gihuta muri uyu murenge, avuga ko ibi bibazo byo kutumva neza ihame ry’ uburinganire bihari, ati” Nibyo koko ibi bibazo birahari : Abagore bitahira igihe bashakiye. Iyo bageze mu ngo zabo, hari igihe barwana nabo bashakanye." Batamuliza Rose asobanura ko iyi myifatire ya bagenzi be ituma abagabo bahoza inkeke ku bagore babo.

Ku ruhande rw’ ubuyobozi bw’ umurenge wa Rugarama, ntibuhakana iki kibazo. Buvuga ko hari icyamaze gukorwa , ariko kandi bukiri mu nzira yo kwigisha abaturage. Kanamugire Innocent ni umuyobozi w’ umurenge wa Rugarama, yagize ati” Nibyo koko icyo kibazo kirahari cy’ uko bamwe mu bagore bumvise ihame ry’ uburinganire uko ritari. Ariko ikiriho, ni uko tugomba kubigisha, tugashaka abafashamyumvire mu rwego rwo kugira ngo abaturage barusheho gusobanukirwa."

Kanamugire Innocent asobanura ko ubuyobozi bwisunga umuganda mu rwego rwo gukangurira abaturage gusobanukirwa uburinganire. Yongera avuga kandi ko ibi bibazo iyo bibaye abashinzwe uburere mboneragihugu kuva ku rwego rw’ umudugudu kugera ku murenge bagerageza kwigisha no gufasha imiryango imeze gutyo. Ikindi kandi abitwaye gutyo bahanirwa mu mugoroba w’ ababyeyi.

Munyaneza Emmanuel


Tanga igitecyerezo

Who are you?