Yashyizweho kuri 26 September, 2018 | 18:05

Kwigisha uburere mboneragihugu mu Banyarwanda byafasha mu migendekere myiza y’amatora

Mu kiganiro Komisiyo y’Igihugu y’Amatora (NEC) yagiranye n’abahagarariye imiryango itari iya Leta (sociétés civiles) ku wa 25 Nzeli 2018 muri Hotel Lemigo, bibanze ku ruhare rw’uburere mboneragihugu mu gihe bwigishijwe abaturage bihagije mbere y’amatora. Byazafasha mu bindi bihe, hakumirwa ibyagaragaye nk’imbogamizi kw’isura nziza y’imigendekere mu matora yatambutse.

Abahuriye muri iki kiganiro kuri Hotel Lemigo, bareberaga hamwe “uruhare rw’imiryango itari iya Leta mu bikorwa by’amatora”. Ni nyuma y’uko Abanyarwanda bavuye mu matora y’abadepite yo kuya 03 Nzeli 2018. Raporo zakozwe kurayo matora, zishima imigendekere yayo muri rusange, nubwo hari hakwiye ko abaturage bigishwa byimbitse uburere mboneragihugu, mbere yuko ayo matora aba. Izo raport zivuga ko abaturage barikurushaho gusobanukirwa uko amatora akorwa, uko batora, ndetse n’uruhare rwabo mu gushimangira amahame ya demokarasi.

Ingabire Marie Immaculée uyobora Transparency International Rwanda, mu kiganiro cye yasabye abateraniye aho kwita ku mitegurire y’amatora cyane igihe cyo kwiyamamaza kw’abakandida kuko ari ho umuturage aba ategereje gusobanurirwa no kumva neza imigabo n’imigambi izamufasha guhitamo abakwiye.
Yagize ati “Ku rugero rw’aho nabashije gukurikirana ibikorwa by’amatora, abaturage ibyo babwirwa n’abakandida mu gihe cyo kwiyamamaza akenshi bigaruka ari bimwe. Kuba nta burere mboneragihugu buhagije bigishijwe bikababera imbogamizi mu guhitamo uwo batora.”

Yongeyeho ko n’abakandida bakwiye guhugurwa mbere yo kwiyamamaza imbere y’abaturage, kuko akenshi basa n’abizeza ibitangaza ngo bishakire amajwi nyamara ahubwo umuturage we abifata nko gutesha agaciro ibyariho. Bityo igihe cyo gutora wa wundi utarasobanuriwe neza abikora uko yumva yabisigaranye muri we, akenshi n’ijwi rikaba imfabusa.

Ibindi byo kunoza

Muri iyi nama hatanzwe umwanya wo kungurana ibitekerezo ku bayitabiriye, Jean Damascene umwe mu bafite ubumuga bwo kutumva no kutavuga yaboneyeho umwanya wo gusaba NEC kubashyiriraho uburyo nabo bazajya bakurikirana imigabo n’imigambi y’abakandida igihe biyamamaza nk’uko bafashijwe mu gikorwa bwite cyo gutora.

Komiseri muri Komisiyo y’Igihugu y’Amatora, Uwera Pélagie ashima uburyo amatora yakozwe neza ati “Amatora yabaye mu mucyo, mu bwisanzure no mu mahoro tubikesha imiyoborere myiza tukaba dushima Perezida wa Repubulika. Dushima kandi uruhare rw’imiryango itari iya Leta n’indorerezi, tunabasaba gukomeza gufasha NEC biziguye ngo turusheho kubaka Demokarasi ibereye Abanyarwanda.”
Ikigo cy’Igihugu cy’Imiyoborere (RGB), nacyo cyagarutse ku bufatanye n’imiryango itari iya Leta mu kunoza uburer mboneragihugu nk’uko umuyobozi. Prof. SHYAKA Anastase yabivuzeho agira ati “Imiryango itari iya Leta itanga ubushobozi, ifite kandi uruhare mu kwigisha Uburere Mboneragihugu, bityo irasabwa kongera imbaraga mu kunoza imigendekere myiza y’amatora dufatanya gucunga neza umutungo mu byagezweho.”

Amatora y’Abadepite bahagararira Abanyarwanda mu Nteko Ishingamategeko yakozwe mu byiciro bitandukanye ku matariki ya 02, iya 03 n’iya 04 Nzeli 2018. Mu bakandida biyamamarije gutorwa, harimo abaturuka mu mitwe ya politiki ndetse n’abigenga. Iki gikorwa kikaba cyaragenze neza hifashishijwe indorerezi 305 zakurikiranye ibikorwa byose, kuva mu kwiyamamaza kugeza amatora asojwe mu mutekano.

Umubyeyi Nadine Evelyne


Tanga igitecyerezo

Who are you?