Yashyizweho kuri 16 July, 2018 | 15:47

Kwanga kugirwa inama n’umugore byamuteye kwahukana mu rugo

Amateka ya Sebushishi na Nimukuze nubwo bakuze agaragaza ko ukwihagararaho, ukutubahana no gutsimbarara bisenya ingo. Nyuma yo kuganirizwa no kwigishwa nyamara, uwo muryango warasubiranye nyuma y’aho umugabo yari yarataye urugo. Ubu ntibabanye neza gusa ahubwo bafasha n’izindi ngo kubana neza.

Sebushishi Yusitini w’imyaka 63 y’amavuko, ni umugabo wa Nimukuze Venantia w’imyaka 47 y’amavuko, basezeranye mu buryo bwemewe n’amategeko ya repubulika y’u Rwanda, bakaba bafitanye abana 5, aho batuye mu mudugudu wa Kabeza mu kagari ka Bunyetongo, umurenge wa Murama w’akarere ka Kayonza.
Nimukuze Venantia yashakanye na Sebushishi Yusitini bamaranye imyaka 27, we asanzwe afite abana bane yari afitanye n’umugore we wa mbere.

Sebushishi Yusitini avuga ko kuva yashakana na Nimukuze yari umuntu ukorera amafaranga kandi ntayabure, ariko kuruhuka kwe akaruhukira ku kabari. Ati”nageraga ku kabari nkakubita amazi, nataha tugasakuza, ariko tugasakuza nta n’icyaha gihari, ahubwo ari rya sindwe ryo kurengwa amazi; ubwo nyuma rero tugasimbuka ejo iwabo, nkajya gucyura, nkemera ibyaha ngasaba imbabazi…ariko simve ku izima…bikomeza bityo… “

Akomeza avuga ko Nimukuze na we yabaga yifitemo akantu k’ingufu mu kumuhata igitsure na we atemeraga, ibyatumwe yahukana amara imyaka itatu aba mu Bugesera wenyine. Ati” iyo agatima kakubitaga, nafataga telefone tukaganira nkamubaza amakuru ye n’ay’abana! Namuhamagaraga ngirango menye ko yavuye ku izima, akambwira ati wagarutse mu rugo ko tuzaganira ibintu bikumvikana bigaca mu buryo, wumva umara iki aho ngaho? Uzaturushye tuza kukujyana wapfuye?”
Yakomeje gutekereza uko yagaruka mu rugo, abana bakaza bakamusura aho yabaga, birangira agarutse mu rugo rwe.

Akigera mu rugo, ngo nibwo yasanze umugore we ari mu ishyirahamwe ry’umushinga indashyikirwa, baraganira uko uwo mushinga wigisha n’icyo rihuguraho abaturage. Avuga ko yamubajije ati” ese wowe wumva ku bwonko bwawe wumva warahugutsemo iki?arambwira ati nanjye hari akantu nanjye numvaga katanjyagamo, ariko ubu nsigaye numva bimeze neza.Ubwo duhuza urugwiro, urukundo ruragaruka bya bwagwa byanteshaga umutwe ndabihagarika! Ariko ubu numva meze neza mu rugo na we nta kibazo dufitanye!”

Ngo ubu ajya inama n’umugore we ku bikorwa byose, ku buryo yumva imbere hazaba ari heza muri iki gihe; ndetse agashimira n’umushinga “indashyikirwa”. Ati”uriya mushinga wamuminjiriyemo agafu nanjye wakaminjiriyemo, ubu mbese hagati yacu hajemo akantu k’urugera,ariko ubundi mbere hararuraga”.

Kutagirwa inama n’umugore

Kwiyemera k’umugabo gutuma yumva ko ari mu kuri kandi icyemezo cye kidakuka, umugore yamugiraga inama akumva ko nagendera ku nama ze azaba amwaye mu bagabo. Sebushishi ati” biba bimeze nko kwihagararaho mu mafuti. Gusa njye sinumvaga ari amafuti, ariko ubu nibwo numva ko ariyo, n’umugabo ubikora nkamwegera ngamije kumuhindura.”

Ubusambo bwa bamwe mu bagore n’abagabo bikorwa nko gusahura urugo bacuranwa, aribyo bikurura amakimbirane. Kuko umugabo n’umugore iyo bombi baciye ku ruhande akagurisha umutungo w’urugo birarukenesha. Ati”habaga igihe mfata nk’inoti ya bitanu nkajya mu kabari wenda mu rugo nta n’umunyu uhari. Nta n’ikiganiro cyahabaga kubera ko nabaga nibereye ku rwagwa! Nagaruka ngeze mu rugo, n’abana bakaba baburara nanjye nkanaburara nkararira ya nzoga gusa; ariko ubu impinduka nuko nta mwana wanjye waburara”

Guhugurwa byabaye imbarutso

Nimukuze Venantia ubu ni umufashamyumvire w’urubuga rw’abagore, wahuguwe n’umuryango Rwanda Wome’s Network, yemeza ko nyuma yo guhugurwa hari ibyinshi byahindutse mu mibanire n’umugabo we mu rugo rwabo. Ati”umugabo wanjye amaze kuva mu rugo, akigera iyo yagiye, yabanje kumpamagara akajya antuka, nyuma agahamagara abaturage, bakamubwira uburyo nifashe, uburyo urugo rwifashe,abana bameze! Nakomeje kwigisha abana baguma mu ishuri, ndetse unaniwe n’ishuri kubw’imbaraga nke nkagerageza kumushakira umwuga.”
Yakomeje kandi guhinga, abana neza n’abaturage akomeza impinduka yari yahuguriwe by’umwihariko. Abaturage bahamagara umugabo bakamubwira uko urugo rumeze; igihe kigeze aragaruka.

Umugabo agarutse mu rugo, ngo yasanze ari umufashamyumvire, aramuhindura, arabyumva kandi abyakira neza, ku buryo kuva icyo gihe kugeza ubu abaturanyi babona hari icyahindutse mu rugo rwabo.Nimukuze Venantia yemeza ko ingo zahuguwe, zifite impinduka kurusha ingo zitahuguwe zikigaragaramo amakimbirane.

Umunyamabanga nshingwabikorwa w’umurenge wa Murama, Mutuyimana Pauline yemeza ko abahuye n’umushinga indashyikirwa iyo hagize uhohoterwa abivuga hakiri kare, cyangwa se haba hari ibimenyetso bijya kugaragaza ihohoterwa akabivuga, bagafashwa kuganirizwa hagamijwe kurwanya ihohoterwa rikorerwa mu ngo. Yongeraho ko imbogamizi igihari ari uko abakiri bato bo bagenda basobanukirwa, ikibazo gikomeye kikaba kikiri mu bakuze batakira neza impinduka, kuko kenshi usanga aribwo buzima babayemo.

Umuhoza Nadine


Tanga igitecyerezo

Who are you?