Yashyizweho kuri 13 June, 2016 | 08:47

Kurandura burundu ubukene bukabije mu ntumbero y’icyerekezo 2020

Minisiteri y’ubutegetsi bw’igihugu imaze gushyira ahagaragara ibyiciro bishya by’abanyarwanda bisimbura ibyarangiye umwaka ushize. Bigaragaza ishusho y’igihugu mu by’ubukungu n’imibereho myiza y’abaturage, bikanafatirwa mu gukora igenamigambi ry’ejo hazaza, bikazamara imyaka 3. Bizaba bigejeje mu cyerekezo 2020, aho nk’uko bivugwa na Leta y’u Rwanda nta mukene ukabije uzaba akibarizwa mu Rwanda, ndetse n’abakene bakazaba bari munsi ya 10% by’abanyarwanda.

Ugereranije n’ibyavuye mu ibarura rusange rya 4ku mibereho y’abaturage (EICV 4), icyiciro cya mbere ni abakene bakabije, naho icya 2 ni abakene, byombi birangwa no kubaho munsi y’umurongo w’ubukene. Ibi byiciro 2 byo bitandukanira ku kuba icya mbere kitabasha kwihaza mu biribwa n’ibindi bikenewe, naho icya 2 cyo kikaba kibasha kubona ibiribwa ariko ibindi ntikibyihazeho.

Mu kiganiro Rwanda Today gihita kuri Radio K F M, Umunyamabanga wa Leta muri Minisiteri y’ubutegetsi bw’igihugu, Dr Mukabaramba Alivera, avuga ko ibyiciro byavuye kuri 6 bikaba 4 kubera impamvu yo kugabanya amazina apfobya umunyarwanda kandi afite aho yavuye n’aho ageze. Ati “ibya mbere byari 6, harimo abatindi nyakujya, abatindi, abakene, abakene bifashije…..ariko ayo mazina yose yarimo asa n’adaha agaciro umunyarwanda”. Yongeraho ko benshi bakoreshaga impuzanyito zayo, bakabita abahanya, abadirigi, n’andi adahesha ishema umunyarwanda.

Ibyiciro bishya byo ni 4, ariko nta mazina bifite, ni inimero gusa : kuva ku cya mbere kugera ku cya kane. Mukabaramba agaruka ku byagendeweho babigena n’uburyo bizakoreshwa. Agira ati “ Twagendeye ku bintu bine, aribyo: Icumbi, Ifunguro, Ibindi byangombwa, n’icyinjiza amafaranga. Icyiciro cya mbere kizajya kishyurirwa na Leta umusanzu w’ubwisungane mu kwivuza ungana n’amafaranga ibihumbi bibiri 2000 Frw, icya kabiri n’icya 3 bitangire 3000 Frw, naho icya kane gitange 7000.

Ibiranga buri cyiciro, n’ingano yacyo

Icyiciro cya 1: Kigizwe n’abakene bakabije, bari munsi y’umurongo w’ubukene bw’ibiribwa, aho umuntu umwe atungwa n’amafaranga ari hasi ya 105,064 ku mwaka(munsi ya 300 ku munsi) mu byo akeneye byose.
Nta cumbi aba afite, nta n’ubushobozi bwo kurikodesha; arya rimwe ku munsi, rimwe na rimwe akanaburara cyangwa hakarya bake; nta bikoresho by’ibanze, kandi nta cyo akora kimwinjiriza agafaranga. Abanyarwanda bari muri iki cyiciro ni 16 % bakabakaba miliyoni imwe n’igice.

Icyiciro cya 2: Kigizwe n’abantu bari munsi y’umurongo w’ubukene, hafatiwe ku biribwa n’ibindi byangombwa by’ibanze: ibikoresho by’isuku, urumuri, imyambaro, ibicanwa, n’ibindi. Aba bashobora kubona ibiribwa, ariko ntibihaze ku bindi, ku buryo umuntu umwe aba atungwa n’amafaranga ari munsi ya 159,375 ku mwaka(munsi ya 450 ku munsi) mu byo akeneye byose.

Umuntu ubarirwa muri iki cyiciro, ntagira inzu ye ariko abasha kwirihira icumbi, abasha kurya nibura 2 ku munsi, abona ibikoresho by’ibanze nubwo biba bigoranye kandi abasha kugira icyo akora kimwinjiriza udufaranga(ibiraka, agatungo, ubucuruzi bworoheje). Abari muri iki cyiciro ni 29,8 nabo ni hafi miliyoni eshatu.

Icyiciro cya 3: Kigizwe n’abantu bafite akazi gahoraho, kabafasha kubona icumbi, bakarya 3 ku munsi, bakabona ibikenewe by’ibanze. Nicyo cyiciro kinini, kuko kirimo abakozi ba Leta n’ab’ibigo byigenga. Kirimo abahinzi borozi basagurira amasoko, n’abacuruzi bacirirtse. Bose barya 3 ku munsi, babona icumbi n’ibikoresho by’ibanze. Abari muri iki cyiciro(n’imiryango yabo) bangana na 53,7% hafi miliyoni 6 z’abanyarwanda.

Icyiciro cya 4 : Iki kigizwe n’abakwitwa Abakire, kuko ari abafite amasosiyete akora imirimo nko kubaka amazu cyangwa gutwara abantu, abafite inganda n’amasitasiyo ya esansi, abafite ibigo bikomeye bitanga akazi n’amazu akodeshwa. Barimo kandi abakozi bakuru muri Leta n’ab’ibigo byigenga (amabanki, amasosiyete y’ubwishingizi, imiryango itegamiye kuri Leta), bari ku rwego rwa Diregiteri. Nubwo bo bakiri bake cyane batagera kuri 1%, ibyabo byose biba byarakemutse(barya neza, baba heza, barizigama, …) ku buryo ari nk’abafatanyabikorwa ba Leta.

Umuyobozi wungirije muri RODA, Sibomana Said, avuga ko “ugereranije n’aho u Rwanda rwavuye mu myaka 20 ishize n’aho rugeze, ukanareba ibihugu bindi twagiye dusiga aho twabisanze, ubukene bwaragabanutse”. Mu mwaka wa 2020 ubukene bukabije buzaba buri kuri 0%, naho abakene bari munsi ya 10% nk’uko Sibomana akomeza abitangaza. “Nta mukene u Rwanda ruzaba rufite mu 2020” niko Minisitiri Mukabaramba we abitangaza. Muri uwo mwaka kandi, RODA ivuga ko abari mu cyiciro cya 3 bazaba ari 68%, ubwo abasigaye( barenga 22%) bazaba bari mu cya 4 cy’abakire.

Zimwe mu ngamba zituma ubukene bugabanuka(icyiciro cya 1 n’icya 2) harimo gahunda ya Girinka, VUP(gahunda y’umurenge w’icyitegererezo), NEP(gahunda yo guhanga umurimo), Nkunganire mu buhinzi, n’Inka y’umukene iteganijwe mu ngengo y’imari 2016-2017. Ku bindi byiciro habaho koroherezwa kubona inguzanyo no gushora imari, kwibumbira mu makoperative, kongerera agaciro umusaruro w’ubuhinzi n’ubworozi, no gufasha abakozi ba Leta kugira ikindi kintu bakora kibinjiriza amafaranga.

Karegeya Jean Baptiste


Tanga igitecyerezo

Who are you?