Yashyizweho kuri 17 May, 2016 | 09:09

Kigali :Hatangiye kubarurwa abatuye ahatemewe ngo bahave

Amazu amwe muri Kigali yatangiye gushyirwaho ibyapa bya Towa, integuza y’uko ba nyirayo bagomba kuyavamo bakimuka kuko mu gace k’amanegeka nk’uko ubuyobozi bubitangaza. Abazayakurwamo, barasaba Leta kubaha ingurane kuko nta bushobozi bafite bwo kwubaka ahandi. Nubwo ari ugukiza ubuzima bwabo, abandi barasaba ko kwimurwa byazakoranwa ubushishozi kugira ngo hatazabaho gukemura ikibazo haterwa ibindi.

Mu mirenge itandukanye y’ akarere ka Nyarugenge ndetse na Gasabo hagaragara amazu ashyirwaho ikimenyetso cy’ umusaraba kizwi ku izina rya “TOWA”. Benshi mu baturage bavuga ko bava mu rugo bagiye ku kazi no gushakisha imibereho , bataha bagasanga inzu zabo zashyizweho ikimenyetso cya towa. Gusa aba baturage bavuga ko batazi imapmvu z’ icyo kimenyetso gishyirwa ku mazu yabo uretse ko basanzwe bakizi ko gishyirwa ku mazu agomba gusenywa. Bazubagira Amani agira ati “turi gutaha tugasanga inzu zacu bazanditseho ntituzi impamvu bashyiraho icyo kimenyetso, umuturage yajya kubaza umuturanyi we ugasanga nawe nta makuru afite.“ Ubuyobozi bw’ akarere ka Nyarugenge buravuga ko buri mu gikorwa cyo kubarura abantu bose batuye mu manegeka ndetse n’ ahandi hantu hose hatemerewe guturwa ndetse bukanashyiraho n’ imbago zibuza abantu gukomeza kuhatura.

Amani avuga ko iki ari ikibazo kibakomereye kuko hari amakuru yatangiye guhwihwiswa mu ma karitsiye ko izo nzu ziri kugenda zishyirwaho ikimenyetso ari izigomba gusenywa kuko ziri mu manegeka.Gusa akavuga ko nta makuru yo gusenywa kw’ izo nzu bigeze bahabwa n’ urwego rw’ ubuyobozi ubwo aribwo bwose.
Umuyobozi w’ akarere ka Nyarugenge Madamu Nzaramba Kansiime avuga ko iryo barura riri gukorwa rizwi ku rwego rw’ ubuyobozi kandi ko riri gukorwa kugirango hubahirizwe ishyirwa mu bikorwa ry’ igishushanyo mbonera cy’ umujyi wa Kigali.agira ati “abantu batuye mu manegeka ntibakwiye gukomeza kuhatura,ubu hari kubarurwa abahatuye bagashyiraho n’ imbibi kugirango bataharenga.”Meya Kansiime akomeza avuga ko abantu bose bafite amazu yabaruwe agashyirwaho ikimenyetso bagomba kwimurwa mu ngengo y’ imari ya 2016-2017.Ngo abatazashobora kujyanisha inzu zabo n’ igishushanyo mbonera cy’ umujyi wa Kigali bazashakirwa aho batura kandi heza .

Bamwe mu baturage bavuga ko bigoye kwimuka mu manegeka kubera impamvu z’ ubushobozi buke bafite kandi ko Leta ntacyo ikora ngo ibafashe kwimuka aho hantu.umwe mu baturage batuye mu manegeka y’ umusozi wa Kigali (Mont Kigali) agira ati “(…) erega natwe ntitwishimiye gutura ahantu nkaha,.reba nawe ukuntu amazi aza ahorera akinjira no munzu.uziko hari n’ababona imvura ikubye bagahunga ingo bakagaruka yahise batinya ko amazi abatwara. “

Ikibazo ni insobe

Abantu batandukanye bibaza impamvu iyi gahunda yo kwimura abatuye mu manegeka ikomeza kugenda biguru ntege kandi bigaragara ko ibiza bikomeje kwibasira abaturage .Hari abaturage bavuga ko Leta isa niyihunza inshingano zayo zo kwimura abantu ibahaye ingurane. Bati “(…)niba nta bushobozi baduhaye bwo kuhimuka ubwo tuzahaguma kuko aho kuba ku gasozi waba mu manegeka… ntayandi mahitamo dufite.“

Kuri iki kibazo Minisiteri y’ ubutegetsi bw’ igihugu n’imibereho myiza y’ abaturage isobanura ko kwimura abantu mu manegeka bigenda bihura n’ inzitizi zikubiye mu ngingo eshatu .Umuvugizi w’ iyi minisiteri Bwana Ngendahimana Ladislas avuga ko hari urwego batarageraho mu kwimura abatuye mu manegeka mu Mujyi wa Kigali.Ati“urwo rwego rushingira ku bintu bitatu birimo amateka y’ imiturire y’ uburyo umujyi wa Kigali wagiye uturwa mu kajagari , bagatura nta gishushanyo mbonera nta n’igenamigambi rinoze ryakozwe , urwego rwa kabiri rugaruka kubuyobozi nk’ ipfundo kuko usanga hari aho bacyubaka n’ijoro kandi bakubakisha rukarakara zitemewe, hakaza urwego rwa gatatu rugizwe n’ abaturage bubaka aho hantu atari n’ inzu babamo ahubwo ari inzu zo gukodesha ari nabo ahanini usanga basaba kwishyurwa ngo babone kwimuka.” Ubuyobozi bw’ iyi minisiteri buvuga ko muri Kigali hari kugenwa imbibi hashingiwe ku buhaname bw’ ahantu, hakagaragazwa ahantu hatagomba guturwa , bityo abahatuye batishoboye Leta ikabafasha kuhava bagashakirwa ahandi batura , hanyuma abishoboye bagashishikarizwa kuhava batabikora ntibemererwe kuhaguma.

Kwimurwa si ibyo guhubukirwa

Hari bamwe mu bakurikiranira hafi ibi bibazo byo kwimura abantu mu manegeka bavuga ko Leta ikwiye kunoza uburyo kwimura abantu hakurikijwe ibyiciro by’ ubudehe kuko kenshi usanga hari abaharenganira bityo ugasanga babuze n’ uburyo bwo kwimuka .Nshimyumukiza Janvier Popote umunyamakuru, avuga ko hari aho usanga bafata umuntu ko afite ubushobozi bwo kwiyubakira kuko aho yari atuye ahafite iyo nzu ariko nyamara bakirengagiza kumenya agaciro iyo nzu ifite.Ngo ibyiciro by’ ubudehe kenshi usanga bidakorwa kuburyo bukwiye bityo bikabangamira bamwe cyane cyane muri iyi gahunda yo kwimura abantu.

Minisiteri y’ ubutegetsi bw’ igihugu n’ imibereho myiza y’ abaturage ivuga ko nyuma yo gushyiraho izi mbago z’ ahantu hatemerewe gutura hazakurikiraho gahunda yo kubimura nayo ikazakorwa mu byiciro bitatu.Icyiciro cya mbere kigizwe n’ abaturage bafite amazu yabo aho hantu ariko bakaba batishoboye. Aba ngo Leta ifite inshingano zo kubafasha kuva aho hantu nk’ abantu batishoboye.Icyiciro cya kabiri kigizwe n’ abantu batuye muri ayo mazu ari mu manegeka kandi bakodesha , abo ngo bazashishikarizwa kujya gukodesha ahandi hatari mu manegeka , naho icyiciro cya gatatu ni’ icyabafite ayo mazu kandi bakaba bafite ubushobozi .Ngo abo bantu bakwiye kumva ko aribo bagomba kuva aho hantu bakajya kubaka ahandi kuko ubuzima bwabo aribwo buba buri mu kaga.

Mu ntangiriro z’ukwezi kwa gatanu imvura idasanzwe yahitanye ubuzima bw’abantu barenga mirongo itatu mu karere ka Gakenke, ndetse no hirya no hino mu gihugu imihanda igwirwa n’inkangu, amazi arayifunga… harasabwa ingamba zihariye mu gufasha abantu kuva ahantu ubuzima bwabo buri mu kaga.Gusa byose bigakoranwa ubushishozi.

Umuhire valentin


Tanga igitecyerezo

Who are you?