Yashyizweho kuri 31 May, 2016 | 07:51

Kigali: Abadafite amikoro bahangayikishijwe n’ubukode bw’amazu buhenze

Mu nama ku iterambere ry’imijyi n’imyubakire yayo ku buryo burambye iri kubera ikigali kuva ku italiki ya 25 kugera kuya 28 Gicurasi 2016, ubuyobozi bw’umujyi wa Kigali buravuga ko burigira ku yindi mijyi uko yakemeye ikibazo cy’amacumbi acirirtse. Ubuyobozi bw’umujyi buvuga ko iki ari ikibazo giteye inkeke kuko ibibanza bihenze ndetse n’ibikoresho byo kubaka.

Iyo urebye ubushobozi bw’abatuye umujyi wa Kigali usanga abenshi baba mu nzu bavuga ko zibahenze. Nk’uko bitangazwa n’umuyobozi mukuru w’ikigo cy’igihugu cy’imyubakire (RHA), Sagashya Didier, ngo inzu iciriritse ni iyo umuntu akodesha atarengeje 30% by’umushara we. Nyamara bamwe bakodesha izirengeje icyo kigero abandi bagahitamo kujya gukodesha iziri mu manegeka, nk’uko umujyi wa Kigali ubitangaza.

Umuyobozi w’umujyi wa Kigali Mukaruliza Monique, avuga kuri iki kibazo yavuze ko kiri mu bihangayikishije umujyi wa Kigali mu gihe hari abantu bagituye mu manegeka bo bakavuga ko biterwa n’ubushobozi buke. Agira ati “ubutaka burahenze cyane muri uyu mujyi bituma abantu kubaka bibagora. Nitubasha kubona inzu nyinshi zifite ibyangombwa kandi zidahenze tuzatuza. Ubu turacyafite abantu bapfa kubera aho batuye kandi iyo urebye usanga aba baba bakodesha, nta mpamvu yo gukodesha ahantu hashyira ubuzima mu kaga.”

Umuyobozi mukuru w’ikigo cy’imyubakire mu Rwanda, Sagashya Didier, agaruka ku nzu ziciriritse zikwiye mu mujyi wa Kigali, yagize ati “mu mujyi wacu hakenewe inzu ku buryo umuntu akeneye inzu y’ibihumbi 60 ayibona ariko n’ukeneye iy’ibihumbi 300 akayibona. Igihe umuntu azaba yabona inzu ziri muri icyo kigero kandi ifite ibyangombwa by’ibanze tuzaba twageze ku ntego yacu.”

Umujyi wa Kigali ufite ubuso bwa kilometero kare 730. 46% by’ubwo buso niho hagomba kuba umujyi ahasigaye hagakorerwa ibikorwa bitandukanye birimo ubuhinzi kurengera ibidukikije,… nk’uko igishushanyo mbonera kizashyirwa mu bikorwa muri 2040 kibiteganya. Gusa ukurikije uko abantu baza mu mujyi biyongera ngo ubu buso bushobora kuzaba buto hatagize igihinduka mu buryo bw’imyibakire, nk’uko bitangazwa na Yasser El-Gammal uhagarariye Banki y’isi mu Rwanda.
Uhagarariye Banki y’isi mu Rwanda, Yasser akomeza avuga ko hakwiye kwihutisha itunganywa ry’indi mijyi yunganira Kigali ku buryo abantu bahabona nk’ibyo babona muri Kigali bityo abantu baza muri Kigali bakagabanuka n’ikibazo cy’amacumbi kikagabanuka.

Musonera Sosthène


Tanga igitecyerezo

Who are you?