Yashyizweho kuri 13 June, 2016 | 14:18

Iyo inzego z’ubuyobozi zihuze bamwe biha ububasha bwo kuzisimbura

Umufundi w’akajagari yafashe umuzunguzayi wa caguwa ati ”twese turakora ibitemewe”. Ibyabereye mu karere ka Gasabo bigaragaza uko iyo ubuyobozi buhuze bamwe bitwara biha inshingano zo kubusimbura.

Muri iki gihe abayobozi b’inzego z’ibanze bo mu karere ka Gasabo bari kwitabira amahugurwa, hasi mu mirenge hasigara nta buyobozi, ku buryo uwubaka mu kajagari asanga afite ukuri kurusha umuzunguzayi, cyane ko uyu nawe acuruza mu kajagari noneho akanacuruza caguwa.

Ni ku gicamunsi cy’uwa gatanu tariki ya 10 Kamena, mu mudugudu umwe uri muri Gasabo, umufundi arasakara inzu ku muhanda, kuko azi neza ko abayobozi baboneje iya KIE mu mahugurwa. Mu muhanda naho abantu barahita, harimo abacuruza ibintu binyuranye: inkoko, ibigori, imbuto, imyenda mbese ni abazunguzayi. Umufundi amanutse ku gikwa, atangira umucuruzi w’inkoko, umuyede nawe afata uw’imyenda, rubura gica. Abubakaga barashaka kwambura abacuruzi ngo barakora ibitemewe, abaturage barahuruye kubakiza.

Umwe mu baturage batabaye ntiyumva ukuntu umuntu uri mu makosa afata undi. Ati “ uriya yakoze bariyeri ngo arafata abazunguzayi, kandi nawe arubaka bitemewe. Ubu se we ari mu kuri, yaretse abantu bakishakira ibirayi nk’uko nawe yaje kubishaka”. Undi nawe akibaza uwamuhaye akazi ko gufata abantu. Ati “niba nta muntu watatse ko yibwe inkoko, niba nta buyobozi bwagushinze gufata caguwa, warebye ibyawe abandi ukabareka?”

Uyu munsi wagira ngo abantu bari bihaye inshingano, ariko ninabyo kuko bazi ko abayobozi badahari. Muri uyu mudugudu, undi mucuruzi w’urwagwa yifatiye ku gahanga umubazi w’ingurube(akabenzi) amubaza niba afite ibyangombwa, nawe akamusubiza ko n’inzagwa zaciwe. Aka ya mvugo y’ikinyarwanda ngo “umugizi azira undi”, umuntu uri mu makosa iyo yihandagaje gukosora undi uyarimo, nta musaruro bitanga. Mu bice by’icyaro rero ntibaripfana: usangirira ku muheha ntiyakwiyama unywera itabi mu ruhame, umucuruzi w’amashashi ntiyakwiyama ukoresha ibiyobyabwenge ngo yumve, yemwe n’umusambanyi ntiyafata umujura.

Gusa binagaragaza ko iyo ubuyobozi buhuze, rubanda bashobora kwikorera ibyo bashaka birimo no kwiha inshingano byatera guhohoterwa kuri bamwe.

Karegeya Jean Baptiste


Tanga igitecyerezo

Who are you?