Yashyizweho kuri 23 August, 2018 | 15:34

Ikibazo cy’abana baterwa inda zitateganyijwe gikomeje gufata indi ntera

Imibare y’abana baterwa inda zitateganyijwe igenda irushaho kwiyongera, nk’uko bigaragazwa n’ubushakashatsi butandukanye. Yaba Leta, imiryango itari iya Leta ndetse n’ababyeyi bahangayikishijwe n’iki kibazo gishyira abangavu benshi mu kaga. Ingamba zirakomeje, ariko ikibazo kiraremereye.

Mu ntangiriro z’ukwezi kwa mutarama 2018, Intara y΄Amajyaruguru yagaragaje ko abakobwa 2773 batarageza ku myaka 18 batewe inda mu mwaka wa 2017 kandi ko iyi mibare ikomeza kwiyongera uko iminsi igenda. Muri aba bose babaruwe akarere ka Musanze kari gafitemo abana barenga 750 . Mu ntara y’iburengerazuba , akarere ka Nyabihu muri uwo mwaka, abakobwa barenga 700 bari munsi y’imyaka 18 batewe inda nk’uko akarere ubwako kabitangaza.

Mbere y’umwaka wa 2017, Minisiteri y’Uburinganire n’Iterambere ry’Umuryango, MIGEPROF, mu cyegeranyo yashyize ahagaragara mu 2016 yatangaje ko abana b’abakobwa bari hagati y’imyaka 16-19 bagera ku 17.500 batewe inda zitateguwe. Ubushakashatsi bwashyizwe ahagaragara n’ Impuzamiryango y’imiryango yita ku burenganzira bwa muntu, CLADHO, bwerekanye ko byibuze 51% by’abana bari munsi y’imyaka 18 y’amavuko baterwa inda n’abantu bakuru ariko 99% by’ababateye inda bakaba badashyikirizwa ubutabera. Polisi y’igihugu yatangaje ko uwo mubare ushobora kuba urenga kure kuko umubare wabonetse ari uwababashije gutanga amakuru, hatabariwemo ababihishe, abazikuyemo, cyangwa se abashobora kuba baratorokeshejwe.

N’ubwo nta bushakashatsi burabishyira ahagaragara, aba bana b’abakobwa baterwa izo nda babiterwa no kubura amakuru ku buzima bw’imyororokere, ubukene mu miryango butuma abana bajya gushabika bagashukwa cyangwa bakamenya gukora imibonano mpuzabitsina bakiri bato ariko batazi ingaruka bibagiraho.

Aba bakobwa baterwa inda si abatarageze mu ishuri gusa. N’abiga mu mashuri abanza n’ayisumbuye barazitwara. Ibi ngo biterwa n’uko mu nteganyanyigisho abarimu basabwa kwigisha ubuzima bw’imyororokere nyamara iryo somo akenshi bakarikwepa kubera isoni zo kuvugira ibyo bita" ibishitani" imbere y’abanyeshuri. Byavuye mu ngendo abasenateri bakoze hirya no hino baganira n’abanyeshuri n’abarimu ku buzima bw’imyororokere muri Werurwe 2018.

Mu bushakashatsi bwakozwe na CLADHO mu turere 10 hirya no hino mu gihugu muri 2016, bwagaragaye ko 49% by’abatwaye inda aribo gusa biyemereye ko bazitewe n’urungano, 20% bavuga ko bazitewe n’inshuti z’imiryango n’abaturanyi, 17% bavuga ko batewe inda ku mpanuka, 6% baziterwa n’ababakoresha, 4% baziterwa n’abo mu miryango yabo, 2% baziterwa n’abarezi, naho 1% baziterwa n’abayobozi b’inzego z’ibanze. Nyuma y’ibi, ubuzima bubi buba butangiye.

Ingaruka akangari…

Uretse abatewe inda, harimo n’abatewe Sida n’izindi ndwara zandurira mu mibonano mpuzabitsina. Abandi benshi ni abata amashuri bikarangirira aho. Si abo gusa, hari abajujubywa n’imiryango yabo bagatorongera.

Nko mu karere ka Musanze, umuryango bawushyiriye umwana wabo wari mu Itorero ry’abarangije ayisumbuye nyuma yo kubona ko atwite, se na nyina babwira umuyobozi wungirije w’aka karere ‘’kujyana uyu mukobwa ku karere, kuko ngo batakwihanganira ko abateza icyasha nk’icyo. Nk’uko bigaragara mu bushakashatsi bwa Cladho nanone, mu batewe inda harimo ufite imyaka 14 wirukanywe mu rugo akimara kubyara umwana wa mbere, aho yicumbikiye umugabo arahamusanga yabuze ibyo kurya amuha amafaranga 1000 amutera inda ya kabiri!

Umwana umwe mu batewe inda afite imyaka 16 yabwiye PAX PRESS ko yirinze kuvuga uwamuteye inda kuko yirindaga ko bamufunga akabura ubufasha yajyaga amuha, ndetse akaba yari akimufasha.

Mu batewe inda harimo abagera kuri 6 batewe inda na ba se. Umwe muri bo w’imyaka 12 yayitewe na se kandi ukibana na nyina mu rugo rumwe.

Ababyeyi barahangayitse

Urebye ibyegeranyo bikorwa kuri iki kibazo, usanga uwakwegeranya abana bose batewe inda zitateganyijwe mu gihugu hose bakuzura umwe mu mirenge ikigize. Urugero rwa hafi ni umurenge wa Rutunga muri Gasabo utuwe n’abaturage 17.525, yewe basatira n’uwa Nyakaliro muri Rwamagana utuwe n’abaturage 20.196.
Musenyeri John Rucyahana avuga ko ‘’bibabaje kubona abangavu buzuye umurenge batarageza ku myaka 18 barabyaye, buri wese (umwana) ahetse umwana mugenzi we.’’

Umushakashatsi Murwanashyaka Evariste, umwe mu bakoze ubushakashatsi bwa CLADHO, agira ati ‘’Birababaje kuba ibintu byo gutera inda abana bimaze kuba nk’akamenyero, kandi ugasanga ababizi bose baryumyeho.’’

Tariki ya 14 Nzeli 2018, abagabo n’abagore bagera ku 165 basinye inyandiko igaragaza ko batishimiye na gato uburyo ikibazo cyo gutera abana inda zitateganyijwe gikomeje gufata indi ntera, basaba Leta n’izindi nzego ko bagihagurukira mu buryo butajenjetse. Iyi nyandiko yashyikirijwe Polisi y’Igihugu, Minisiteri y’Ubutabera, Ikigo cy’igihugu gishinzwe Ubugenzacyaha (RIB), Urukiko rw’ikirenga, n’Ihuriro ry’imiryango nyarwanda itari iya Leta.

Ubwo habaga Inama Nkuru y’Abana ku nshuro ya 11, Perezidante w’Inteko Ishinga amategeko Umutwe w’Abadepite, Hon Donatile Mukabalisa, yasabye abana kuzirikana inshingano bafite yo kwiga, ndetse akanasaba ababyeyi kubaganiriza ku bijyanye n’ubuzima bw’imyororokere.

Umubyeyi wateye umwana we inda ahanishwa igihano cya burundu y’umwihariko. Uwahishe amakuru azi ahanishwa igifungo cy’amezi 6.

HIGIRO Adolphe/ PAX PRESS


Tanga igitecyerezo

Who are you?