Yashyizweho kuri 4 May, 2016 | 08:12

Ibyapa biriho nomero z’imihanda biyobya bamwe

Kuba nomero z’ibyapa ziba zidakurikiranye, kuba abaturage bamwe badasobanukiwe uko bikoreshwa, bituma bamwe mu bo ibyapa byashyiriweho mu mugi wa Kigali bibayobya. Ababa biyizeye mu kubikurikira, usanga nabo bagendera ku mibare bakisanga byabohereje ahahabanye n’aho bajyaga.

Umugabo w’imyaka 30, aragenda abaza aho ikigo kimwe giherereye nyuma yo guhaguruka mu rugo yizeye ko ibyapa byo kumuhanda biramuyobora ariko akaza kuyoberwa uko abyifatamo. Uyu mugabo uvuga ko yazengurutse agace kanini k’umurenge wa Kimihurura, ahagaze hagati y’ibyapa KG 624 na KG 626 kandi arajya kuri KG 625 street 12; yazengurutse hagati yabyo ariko ntiyiyumvisha uko icyapa agiyeho cyaba kitari hagati aho! N’umunaniro mu maso aragira ati“nageze aha saa tatu, none ubu ni saa tanu. Nashatse iki cyapa nakibuze, nazengurutse ahitwa mu Rugando, nyura munsi ya Lemigo, ngera ahubatse umurenge, nkomeza kuri rond point y’ahari kubakwa convention center ariko nabuze icyapa cya KG 625 street 12. Birangiye nkerewe inama nari ngiyemo none nditahiye."

Undi mugenzi we w’umunyamahanga yayobewe uko nomero zikurikirana mu murenge wa Kimironko, yashakishije iyo bamubwiye arayibura. Avuga ko bidasobanutse ukuntu nomero zidakurikirana uko bisanzwe cyangwa ngo habe hari ubundi buryo buzwi, butuma umuntu amenya aho ajya ku buryo butamugoye.

Ku rundi ruhande ariko, hari abo bifasha cyane cyane ababikurikiza bakoresheje ikoranabuhanga. Aba bo bandika nomero y’umuhanda muri Google Map, bagahita babona agace bagiyemo. Pierre M. abihamya agira ati « nkanjye sinayoba kuko muri telefoni yanjye biranyorohera kumenya aho njya iyo nzi nomero zaho. Mpita nzandikamo bakampa ikarita nkurikiza mpaka ngeze aho njya ntayobye na gato. »

Cyakora ngo n’ubwo bifasha abantu nka we, ngo bikwiye kurushaho gusobanurirwa abaturage uburyo nomero zashakishwa hatifashishijwe iryo koranabuhanga.
Ibi byapa byashyizwe ku muhanda n’umujyi wa Kigali muri 2014, hagamijwe kurushaho kuyobora abantu ndetse binashyirwa ku ikoranabuhanga ku buryo umuntu abasha kumenya aho ajya mbere yo guhaguruka ajyayo. Gusa abanyarwanda ntibarabyifashisha cyane kuko usanga bataramenya kubikoresha no kuranga aho batuye cyangwa bakorera babyifashishije. Ku mihanda biriho mu Rwanda, ushobora kuva ku muhanda nomero 210, ugahita ukurikizaho uwa nomero 245(ni urugero Ndlr). Ibi ngo bikaba bitera urujijo benshi ku buryo ngo kubikoresha bibagora nk’uko bitangazwa na Uzabumugabo V. utuye i Kanombe.

Mu bihugu by’amahanga aho ibi byapa bikoreshwa cyane, usanga hari amahame bagenderaho mukubishyiraho n’umuturage wo hasi akaba abizi. Mu gihugu nk’ubufaransa birazwi ko nomero zitagabanyika na kabiri zijya ibumoso naho izigabanyika na kabiri zikajya iburyo.

Muri Gahunda ya Smart City, umujyi wa Kigali washyize ikoranabuhanga hamwe mu hantu hakoreshwa n’abantu benshi no mu ma bus. Iri rifasha uhari kuba yakoresha internet ku buntu muri ubwo buryo akaba yanayifashisha ashakisha aho agiye. Nyamara ariko hari abatunze telefoni bayihamagaze, bigira gusoma amakuru cyangwa se ku mbuga nkoranyambaga, batita ku kuba bayikoresha bashakisha aho bagiye.

Abatarabisobanukirwa bahitamo kwisunga abamotari aho babasobanurira aho bagiye bakabahageza bakurikije uko hazwi muri rusange (Kwa Mushimire, Kwa Lando, Kwa Guiness I Nyamirambo, Kuri Kiliziya y’aha n’aha,...) bagahitamo guhendwa ku mafaranga bishyura ariko badataye umwanya bashakisha aho bagomba kujya.

Musonera Sosthène


Tanga igitecyerezo

Who are you?