Yashyizweho kuri 3 April, 2016 | 07:50

Ibikorwa abaturage batagizemo uruhare bihombya Leta

Kwirukankira gushyira ibikorwa by’iterambere ry’abaturage hariya cyangwa hariya, abo bigenewe batabitanzeho ibitekerezo ni nko kwikirigita ugaseka. Abo bigenewe ntibabyibonamo, bakanga kubyitabira n’iyo hashyirwamo ingufu z’umurengera ntibitinda kubona ko uwabikoze yibeshye, agatesha abandi umwanya n’igihe ariko anashora igihugu mu bihombo. Ngibyo ibirangiye bibaye ku isoko rya Kirengeri mu karere ka Ruhango intara y’amajyepfo no kuri gare ya Kicukiro mu mugi wa Kigali.

Mu mwaka wa 2000 Perezida Kagame yemereye abaturage batuye muri uwo murenge wa Byimana isoko rya Kijyambere. Muri 2002 bararishyikirizwa nyuma yo kuzura ritwaye miliyoni zisaga 30 z’amafaranga y’u Rwanda. Kuva barihabwa ubwitabire bw’abacuruzi ndetse n’abaguzi mu kurikoresha icyo ryubakiwe bwari hasi cyane kuko benshi bavugaga ko ryubatswe kure yaho iryo bari basanganwe mu gasanteri ko mu Byimana ryari riri. Umunyamabanga nshingwabikorwa w’umurenge wa Byimana Nahayo Jean Marie avuga ko hari n’igihe inzego z’umutekano zajyanagayo abantu ku ngufu ngo baryitabire. Ariko biranga biba iby’ubusa.

Impamvu ntiri kure. Ndayishimiye Brigitte atuye mu Mudugudu wa Rugerero, Akagari ka Kamusenyi abisobanura muri aya magambo “bamaze kuryimura twahise twanga kurirema kuko abaturage bazana ibiribwa bitandukanye babikuye muri ririya mu misozi batongeye kugaruka bavuga ko rigiye kure. Hariya hantu hadatuwe ibutamoso natwe twabonaga hatubangamiye tukanga kujyayo.” Na bake bagiyeyo byababereye guhomba. Uwamariya Marie Rose, atuye mu Kagari ka Muhororo, avuga ko iyo bagiye guhaha muri iryo soko babura ibyo bahaha. Ati “Isoko ryimuriwe i Kirengeri ntacyo ritumariye, kuko ujya kurihahamo ukabura icyo uhaha kuko nta bicuruzwa bibamo.”
Mu mujyi wa Kigali, gare ya Kicukiro nayo urwayo ntirutandukanye n’urw’isoko rya Kirengeri. Nyuma y’imyaka 18 yubatswe icyo yari yarubakiwe cyakomeje kugorana gushyirwa mu bikorwa. Kuba ariho abagenzi bategera byinubirwaga na benshi bavugaga ko yashyizwe hirya cyane ku buryo abagenzi bahitagamo gufata moto cyangwa gutegereza izivamo batarinze kujyayo. Iyi gare iherereye mu murenge wa Gatenga mu Kagali ka Nyanza ubu irafunze. Mu ntangiriro z’ukwezi kwa gatatu Adalbert Rukebanuka Umunyamabanga Nshingwabikorwa w’Akarere ka Kicukiro yabwiye www.umuseke.rw ko iyi gare yafunzwe ndetse yashyizwe ku isoko kuko imodoka zitari zikiyijyamo. Ati “Twashyizeho ipiganwa ku nshuro ya mbere nta Campany yigeze itwandikira ivuga ko ihashaka, ubu nibwo inama Njyanama y’Akarere iheruka yafashe icyemezo cy’uko hagomba kwegurirwa abikorera ku giti cyabo hakabyazwa umusaruro hakareka kubaho hacungwa na Leta, iriya gare ikareka kubaho ipfa ubusa.”

Umwe mu baturage batuye Kicukiro avuga ko n’ubundi kuyifunga byari byaratinze kuko ari nk’aho ntacyo yamaraga. Ati”ubundi iyi gare yari yarubakiwe gufasha abaturage batuye mu bice bya Gahanga, Rebero, Murambi, Karembure na Nyanza ariko imaze no kuzura bakomeje kugira ibibazo kuko imodoka zitwara abantu zitazamukaga ngo zihagere.” Nyamara abandi bo bakavuga ko abagenzi aribo bamenya ahabanogeye kuko ababatekererza aho gushyira gare akenshi usanga bifitiye imodokari zabo bakabatekerereza bazi neza ko batazaza gutegeramo. Vénuste Muhire ati” ibi byose ni ukumva ko ubuyobozi aribwo bugomba gutekerereza abaturage. Hari aho imodoka zahagararaga mbere. Aho niho abaturage bari barashyize mu mitwe yabo. Indi nayo rero ijyanye n’igihe ntiyari kujya kure y’aho. Iyo rero utagishije inama abagenerwabikorwa ibyo ukoze birirangiza byo ubwabyo.”

Ibikorwa birangira bitaye agaciro

Nyuma yo kubona ko ridatanga umusaruro ryari ryitezweho ubuyobozi bw’akarere ka Ruhango bwanzuye ko ryahabwa umushoramari w’umuyapani uzahashyira uruganda rutunganya igihingwa cya Makadamiya. Abafite ibikorwa by’ubucuruzi muri uyu Mujyi wa Byimana, nabo bavuga ko kwimuka kw’iri soko byabateje igihombo gikomeye, ngo kuko abaturage baturukaga ahitwa Mbuye, i Mutara basigaye barema isoko ry’ahitwa ku Ntenyo n’ahandi. Umunyamabanga nshingwabikorwa w’Umurenge wa Byimana, Nahayo Jean Marie, nawe ashimangira ko isoko abaturage bubakiwe batarikoresheje kubera inyigo yizwe nabi. Yagize ati “Isoko rimaze kwimurwa byarakaje abaturage, bacika intege banga kujya mu ry’i Kirengeri. Icyatumye bataryitabira ni uko ryashyizwe hariya batagishijwe inama ngo babazwe aho babona habereye kubakwa isoko rya kijyambere, inyigo yizwe nabi n’ubuyobozi bwariho icyo gihe.”
Uyu muyobozi avuga ko bamaze kubona ko abaturage banze kurema isoko rya Kirengeri bandikiye ubuyobozi bw’Akarere ka Ruhango. Ati “Mu nama Njyanama y’Akarere iheruka hemejwe ko ririya soko ryakoreshwa ibindi bintu birimo kuhagira ububiko bw’imyaka, uruganda rukora ifumbire ijya mu muceli, ariko hari n’umuterankunga w’umuyapani ugiye kuritizwa akahashyira uruganda rw’igihingwa cya makadamiya.”

Kuri gare ya Kicukiro umunyamabanaga nshingwabikorwa asobanura impamvu gare yashyizwe aho hitaruye agira ati “Twashakaga kugabanya umubyigano w’imodoka muri rusange ugaragara Kicukiro Centre uterwa ahanini na ziriya bus nini zitwara abagenzi. Ariko twatunguwe no kubona Akarere kubaka gare ntikoreshwe.” Nubwo iri ku isoko nta kindi gisubizo cyo gutega kw’abagenzi cyavuzwe. Gusa abaturage bategera muri icyo gice basaba ko mu gufata ingamba runaka ku bikorwa nka biriya bitwara Leta amafaranga menshi umuturage yajya ahabwa ijambo. Kuko ngo “umugenerwabikorwa niwe umenya mbere na mbere ibyo akeneye.”

Niyonagize Fulgence


Tanga igitecyerezo

Who are you?