Yashyizweho kuri 12 May, 2016 | 12:33

Ibigo byubakiwe incike byazikuye mu bwigunge

Mu Rwanda, ibikorwa byo kwibuka abazize jenoside yakorewe abatutsi birakomeje mu minsi ijana. Kwita ku basizwe iherureru nayo birakorwa.Bamwe mu babyeyi bagizwe incike bashyizwe mu bigo aho bitabwaho, bakitanaho, bakava mu bwigunge. Ariko hari n’abandi bavuga ko batabikunze. Gushaka ubwigenge bikabatera kwibana.

Mu murenge wa Rwabicuma, mu karere ka Nyanza mu ntara y’amajyepfo huzuye ikigo cyita ku babyeyi b’incike. Cyubatsemo amazu 4 atuyemo ababyeyi 16 barimo abasaza 2 n’abakecuru 14.Inzu imwe ibamo abasaza 2 izindi zikabao abakecuru. Madeleine Mukagatare ni umukecuru w’incike w’imyaka 92. Yapfushije umugabo n’abana batandatu muri jenoside yakorewe abatutsi. Ubu atuye muri iki kigo cya Rwabicuma. Arishimira ubuzima bushya abayemo muri iki kigo. N’akanyamuneza aragira ati ’’ Hano tubayeho neza pe, turafashwa muri byose. Nk’ubu badukorera isuku, bakatwuhagira nkatwe tutakibishoboye bakaduha ibyo kurya. Reba nawe iki cyumba cyanjye, urabona ko gishahe neza, kirakoropye akarusho rero n’ubwogero burimo. Ibi byaramfashije cyane nkiri iwacu nogaga rimwe mu minsi itanu kuko naburaga amazi kandi aho nogeraga ari kure y’inzu. Yewe n’iyo narwaraga naburaga unjyana kwa muganga nkarembera iyo. Ariko hano baduha ibyo byose ’’ .

Uko kwitabwaho gutuma bacya mu maso bafite akanyamuneza bagaragariza ababasura. Dancile Nyirafundi ni umubyeyi w’imyaka 80 . Yabuze abana be umunani n’umugabo kubera genoside. Abana n’abandi bakecuru 3 mu nzu imwe mu ziri muri uwo mudugudu. Arasobanura uko abayeho muri iki kigo. "Nu bwo ubona dushaje ariko iyo turi hano turatarama mu buryo bwacu. Tuvuga imivugo, imigani tukaganira tugaseka mbese tugasusuruka. Ndi umwe mubakiri bato ni nanjye ubasusurutsa ngashyiraho morari. Ikindi kandi hano tugerageza no gukora uturimo. Turakubura ndetse tunafasha abakozi bo mu gikoni guhata ibirayi no guteka kugira ngo tudahinamirana. Ariko uzi ikintu nkundira hano cyane ni igaburo rya sa sita cyangwa nimugoroba duhuriraho. Rituma numva ndi mu muryango.

Muri icyo kigo, ababyeyi bose basangirira hamwe. Bafite inzu nini y’uruganiriro bahuriramo bakarya baganira, baterana ubuse. Ibyo ngo bituma umutwaro w’imiryango yabo babuze ugabanuka.

Barasusurutsanya

Nyuma yo kurya , ababishoboye bakora urugendo ruto baruhutsa amaguru kubera kwirinda indwara zo mu zabukuru. Abandi rero bajya kota akazuba iyo bamaze kurya. Ni mu busitani bwiza bw’icyo kigo, aho bita mu gacaca. Dancile akomeza avuga uko ako gacaca kabasusurutsa ‘’ Twicara aha mu gacaca hano imbere y’inzu. Haba hari akayaga keza kava aho hepfo mu kibaya. Twicara dukoze uruziga rero tugatangira gusakuza, no gutebya. Ufite agatabi agaha undi. Ibyo biganiro rero biratwubaka cyane bigatuma tutihugiraho kuko twumva ko ubuzima buryoshye’’.

Ubuzima muri iki kigo butandukanye n’ubwo abandi babyeyi b’incike bibana babayeho. Chantal Munganyinka ni umubyeyi ushinzwe ubuzima bw’abari muri icyo kigo. Nawe avuga ko abona iryo tandukaniro. Agira ati’’ ababyeyi bakiza wabona bigunze, buri wese ari mu nguni ye mbese badasabana. Ariko uko iminsi ishira bagenda begerana, bakaganira buri wese akumva ubuzima undi yanyuzemo bikamutera kumva ko atrai wenyine. Uretse n’ibyo twita ku buzima bwabo ku buryo ntibakirwaragurika, bakorerwa isuku yose kandi barya indyo yuzuye bigatuma ubona bafite inyota yo kubaho. ’’

Aba babyeyi kandi bitabwaho igihe bagize ikibazo cy’ihungabana kubera ibyabayeho muri genoside yakorewe abatutsi mu 1994. Iki kigo cya Rwabicuma cyatashywe mu mwaka ushize wa 2015 .Kikaba cyarubatswe ku nkunga ya ‘’UNITY CLUB’’, umuryango uhuriweho n’abagore b’abayobozi. Kikaba cyarafunguwe ku mugaragaro ku itariki ya 03/07/2015 na Nyakubahwa madamu Jeannette kagame. Gusa ibigo nk’ibi biracyari bike ugereranije n’ababyeyi bakeneye amasaziro meza basizwe iheruheru na jenoside.

Bose ntibifuza gusazira mu bigo

Iyakaremye Antoine ni umusaza w’imyaka iyingayinga 100. Yibana mu nzu ya wenyine mu mudugudu wubakiwe abarokotse jenoside wa Rusheshe, mu karere ka Kicukiro. Ku myaka ye ntagishoboye rwose kwiyitaho mu buryo bwose. N’ubwo yubakiwe inzu nziza y’amatafari ahiye , usanga atabasha kuyisukura uko bikwiye. N’imyambaro ye iyo umureba ubona ko idasukuye kubera ko ntawe afite umwitaho. Rimwe mu kwezi abapfakazi baturanye nawe baza kumukorera isuku. Ati ‘’ nta ngufu ngifite ndetse nsigaye ndibwa no mu mitsi umubiri wose kandi nsabwa kwikorera byose. Cyokora nkaraba rimwe mu cyumweru. Ku birebana n’ibiribwa byo nteka ibyoroshye, ni ibishyimbo n’ibijumba nibyo nshoboye. Mbiterekaho nkaryama nkaza kwicura bihiye. Ibyo gufura byo ni ikibazo iyo mfite akagufu mfura ipantalo 1 cyangwa 2 gusa. Icyifuzo cyanjye ni uko nabona uwamfasha mu turimo two mu rugo kuko nta mugore wanyemera ndashaje cyane’’.

Muri iki gihe cyo kwibuka abaize genoside yakorewe abatutsi, benshi usanga bafasha ababyeyi b’incike bameze nka Antoine. Gusa ngo nyuma y’iki gihe cyo kwibuka usanga basa n’abatereranwe. Leta ibagenera ubufasha bw’amafaranga angana n’ibihumbi umunani ku kwezi ariko akenshi abageraho atinze bigatuma ubuzima bwabo butamera neza. Benshi bafite aho kuba bubakiwe nyuma ya 1994, ariko amazu babamo arashaje ku buryo badafite ubushobozi bwo kuyasana.
N’ubwo bimeze bityo ariko ngo Antoine we ntashaka kujya gusazira mu kigo cyamwitaho. Ngo kuko akunda kwigenga kandi ubwo buzima abayemo n’ubwo ari bubi agenda abumenyera.

Uwambayinema Jeanne


Tanga igitecyerezo

Who are you?