Yashyizweho kuri 22 January, 2018 | 12:04

HPA yafashije kurwanya ihohoterwa biciye mu biganiro, ikinamico no kwizigamira mu matsinda

Kubafashwa kwizigamira bakirinda ihohoterwa, gufasha urubyiruko n’ababyeyi kuganira biciye mu makinamico, ni bimwe mu bikorwa umushinga ugamije ibikorwa birwanya ubukene (HPA)wagejeje kuri bamwe mu batuye imirenge y’uturere twa Gisagara na Nyaruguru.

Ntibyoroshye guhuza ukuntu ibikorwa byo kwiteza imbere wizigamira bihuzwa no kurwanya ihohoterwa rikorerwa mu ngo. Zayezu Rosine wo mu murenge wa Kansi avuga ko bihura cyane. Ati" Iyo ntacyo winjiza mu rugo uteze byose ku mugabo agufata uko ashaka ndetse akaba yanaguhohotera ku maherere. Ariko iyo ukora ukagira icyo winjiza ukanizigama abona ko ufite itafari mu kubaka aurugo akabikubahira byose ku bw’inyungu z’umuryango."

Ibi Zayezu n’abandi babana mu itsinda babigeraho biciye mu matsinda yo kwizigama bagiriwemo inama na HPA mu murenge wa Kansi. "Icyo nakoze mu kwizigama nabaga mfite amafaranga nagira ikibazo nkayarya nkayarangiza. aho mbimenyeye nkoresha amwe andi nkayazigama ayo nkoresha mu rugo ni ayo nunguka sinkora ku gishoro".

Ibi ngo byatumye abagore bagira agaciro kuko mbere basabaga byose abagabo cyangwa basabiriza abandi bantu. Ubu bukene butuma batagira icyo bakora batizigama bwatumaga habaho amakimnbirane ahoraho aterwa nuko abantu baba banduranya umwe asaba aka undi asaba kariya bagahora mu ntugunda. "Amatsinda rero icyo afasha ni ukugira abagore inama, akabereka uko bakoresha amafaranga ku buryo bava ku rugero rwo gusabiriza byose ahubwo bakagira uruhare mu iterambere ry’urugo" uko bisobanurwa n’umwe mu bagore.

Nkuko undi mubyeyi kandi abivuga, ubukene cyane bw’umugore butuma hari ibyo adaha abana be iyo afite umugabo utagira icyo yitaho. Ibyo bitera bamwe mu bana nk’ab’abakobwa kwishora mu tugeso dutuma babona amafaranga bikaba byabatera kujya mu busambanyi cyangwa ubundi bwomanzi. "

Uwimana Pepétue ufite abana bane we avuga ko iyo umugore ategereye abandi aba ameze nk’uri mu kato. Ariko iyo ahuye n’abandi amenya uko abandi bateye imbere nawe akabigana akajya mbere. Ayo matsinda ariko ngo anabafasha kumenya uko bitwara imbere y’abagabo babo kuko hari igihe bitera ihohoterwa kubera kutamenya uko bitwara imbere y’abafasha babo.

Si abagore gusa bafashwa kwizigama. Mu murenge wa Save abana b’abakobwa bafashijwe kwizigama kuva ku giceri cy’amafaranga ijana bituma bamwe biteza imbere. Ibi bikorerwa mu matsinda atandukanye. Bahoneza Mwari, Imbere heza, Terimbere mwari, ni amatsinda afasha aba bana kwizigama. Niyonizeye Pelagie wo mu itsinda Imbere heza atanga ijana buri cyumweru. Ngo iyo amafaranga bizigamye ageze nko ku bihumbi mirongo itatu bagura ibishyimbo bakabibika noneho byazamuka bakagurisha bakabona inyungu kandi buri wese agatangira kugira umutungo we. Aya mafaranga ngo bayahabwa n’ababyeyi babo bamaze kumenya agaciro kabyo.

Nyamara ariko ngo ku mwana ugitangira azana mironko y’ibishyimbo iza ikaba nk’igishoro noneho ubundi akajya azana ijana buri cyumweru. Ibi bibarinda kugira irari ry’utundi tuntu bashobora kwifuza bakaba babishukishwa n’abasore. N’ubwo amafaranga bagurizwa ari make nka Bizumuremyi Sipesiyoza umwana wagujije amafaranga igihumbi kugira ngo afashe gusana umusarane w’iwabo ngo birabafasha kuko uwo musarane watunganye kandi akungukira itsinda amafaranga ijana gusa. Hejuru yo kwirinda ababashuka ngo byatumye bamenya akamaro ko kwizigama ku buryo nta kibazo umwana yagira ngo ararikire kuyashaka ahandi kuko itsinda rigutabara. Ikindi ngo amafaranga ntazigamirwa kuyarya ni ukugira ngo azagoboke ahakomeye ariko cyane bazabikurane nibaba bakuru bizabafashe mu buzima bwabo.

Ikindi ngo bamwe babona n’impano zabo kuko hari nk’abaguza bagacuruza imboga, imbuto,... ku buryo hari abana batagitega ibisubizo ku babyeyi babo bose.

Kuganira biciye mu makinamico

Mu murenge wa Kigembe mu karere ka Gisagara abasore n’abakobwa badahabwa umwanya n’ababyeyi babo ngo bababwire ku buzima bw’imyororokere bahitamo kubiganiriza bagenzi babo ndetse n’ababyeyi biciye mu makinamico. Nkurunziza Jean Claude utoza urwo rubyiruko avuga ko bakoresha ikinamico zitandukanye zifite ubutumwa butandukanye: Kwirinda ihohoterwa, inda z’indaro kwizigama, kurwanya ibiyobyabwenge n’ibindi. Nkurunziza ati "vuba aha mu kagari k’Agahabwa twabonye hari umubare w’abana benshi bava mu ishuri tukabibona nk’ingaruka y’amakimbirane n’ihohoterwa mu ngo. Ati" twagiye muri ako kagari tuhatanga ubutumwa butandukanye bugaragaza imvano y’’uko kuva mu ishuri."

Uru rubyiruko kandi runigishamo abakuze ko kuryamana utumvikanye n’umufasha wawe ko nabyo ari ihohoterwa ko abantu baba bagomba kubanza kuganirizwa. Ibi ngo bitanga umusaruro kuko nyuma y’ikiganiro, abitabiriye ikinamico baganira bakagasingazanya ibyo ikinamico yabunguye.

Mu kagari ka Nkakwa umurenge wa Nyagisozi, naho ikinamico zikorwa n’urubyiruko rifashwa mu guhwitura abakuru. Umwe mu bategura aya makinamico ati" ababyeyi iyo bamaze kureba no kumva ikinamico, basa n’abahwituwe ukumva bikomanze ku mutima bakagira ikimwaro kuko baba bahanurwa n’abana babo kandi aribo bakagombye kubahanura." Nk’uko uyu akomeza abivuga ibivugwa mu makinamico ni ibiba bigaragara ko bikorerwa muri izo ngo. Ati"hambere aha twakinnye iyitwa turamurika. Iyi yavugaga ku rugo rw’umwe rubanye neza n’urundi rubanye nabi muri ako gace. Twagaragaje izi ngo zombi muri izo kinamico mbese abwirwa benshi yumva bene yo."

Akamaro k’aya makinamico katumye ubuyobozi buyaha agaciro kuko ngo urubyiruko ruhabwa umwanya nyuma y’umuganda cyangwa mu nama n’abaturage kandi abaturage bagakurikira kuko ubutumwa butangirwamo buba bububaka bose. Kimwe mu bituma ababyeyi babyitabira ni uko ngo babona ko bifasha abana kuko nabo babona amatsinda abana babo babamo adakina amakinamico gusa, ahubwo akora n’ibindi biyafasha kwiteza imbere. Ibi kandi ngo uru rubyiruko bizabikomeza umushinga HPA wakomeza utakomeza kuko wabahaye umusingi nabo bagomba kwitaho. Jean Claude Nshimiyimana, umuyobozi wa HPA mu Rwanda avuga ko bahisemo gukorera muri aka karere kuko ihohoterwa rihagaragara cyane aba ari naho bahitemo gushyira umwotso.

Gufasha uwahohotewe

Nubwo urubyiruko rutanga umusanzu mu gufasha abahohotera cyangwa abahohoterwa kumenya uburenganzira bwabo ndetse no guhwitura ababikora, ariko kandi HPA itanga ubundi bufasha. Safe Homes zizwi nk’inzu zitanga ubujyanama zifasha abahohotewe. Mu murenge wa Ngera, akarere ka Nyaruguru abakoraga cyangwa bagakorerwa ihohoterwa bavuga ko izi nzu zabafashije cyane abatinyuka bakazigana. Uyu mugore ati " Natinze kubyara umugabo akajya anywa inzoga akankubita naho mbyariye birakomeza; bimaze kundenga nza hano batugira inama none ubu tubanye neza."Undi ati twamaranye imyaka umunani tubanye nabi uko aje yasinze akankubita." Umugabo w’uyu mugore ati" ninjye rwose wamuhohoteraga kuko ayo nakoreraga aho kuyazana najyaga kuyanywera nkaza ndwana nigeze no kumukubita ndamukomeretsa."

Nyamurangwa Goretti,umukozi ushinzwe kwakira abahohotewe ku murenge wa Ngera,avuga ko akunze kwakira abagore babanye nabi n’abagabo mu ngo. Ati "Hari ababa bafitanye ibibazo n’abagabo tukabunga bagasubirana nta handi bagiye. Hari n’abandi byanga bakajya mu zindi nzego z’ubuyobozi iyo ikibazo cyananiranye." Nk’uko abivuga ngo abenshi yakira ni ababa bafite ibibazo by’ihohoterwa rishingiye ku mutungo cyangwa abaza bakubiswe. Habanza kwakira uwahohotewe, agafashwa kwakira ibyamubayeho nyuma hagakurikiraho guhamagaza uwamuhohoteye akaganirizwa akerekwa ububi by’ibyo yakoze. Goretti ati"Iyo yinangiye ashyikirizwa polisi."

Gufashwa byarateguwe kuko uwahohotewe agasa n’ugira ihahamuka ahabwa icyumba aruhukiraho akaganirizwa atuje. Ubu avuga ko iyi nzu yabashije gufasha abantu bagera ku ijana batatu gusa akaba aribo bahisemo gutandukana abandi bakaba babanye neza.

Ibi kandi ni nako bigenda mu murenge wa Nyagisozi ahari inzu nk’iyi. Abafashijwe n’izi nzu bavuga ko ikiruta ubu bujyanama bumarira abagana izi nzu ari uko butuma abafitanye amakimbirane baganira, bagahanurwa, bagahabwa inama kuruta uko byari kuba byakorerwa nko ku mudugudu nk’uko umwe mu bahuguwe abivuga ati" Iyo babitubwira muri rusange nko mu mudugudu ntacyo byari gutanga kuko wenda umwe yari kuba afite abamushyigikiye n’undi bikaba bitari butange igisubizo.Ariko iyo uganirijwe mwiherereye buri weseyumva amakosa ye agahanwa agahabwa inama mbese mu kabicoca mu bwubahane. "

Gusa ngo muri izi nzu usanga abagore aribo batinyuka kugaragaza ihohoterwa ryabo kuko abagabo bake aribo bavuga ko bahohoterwa ibigaragara nko kuba ari ukugira ipfunwe ryo kuvuga ko bibabaho imbere y’umujyanama w’umugore wakira abahohotewe. Basaba ko umujyana w’umugore wagira abamugana yafashwa n’undi w’umugabo abagabo bakwibonamo.

Umunyamabanga nshingwabikorwa w’umurenge wa Ngera Ndayiragije Simon nawe yemeza ko iyi nzu yagize umumaro,kuko hari icyo yagabanije ndetse ngo yanafashije abaturage kumenya uburenganzira bwabo,ikaba inafasha ubuyobozi gutambutsa ubutumwa bujyanye no kurwanya no kwirinda ihohoterwa.

Uwambayinema Jeanne


Tanga igitecyerezo

Who are you?