Yashyizweho kuri 18 July, 2018 | 09:19

Gitesi: Abavutse ku babyeyi babanye badashyingiranywe barasaba uburenganzira k’umutungo.

Bamwe mu babyeyi bo mu murenge wa Gitesi mu karere ka Karongi, barasaba ko abana babyawe ku babyeyi batashyingiranywe imbere y’amatgeko,bagira uburenganzira bwo kwemerwa n’abababyaye ,ndetse no kwandikwa mu bitabo by’irangamimerere ,bikabahesha kugira uburenganzira ku mitungo .

Nk’uko biteganywa n’itegeko ry’umuryango, No 27/2016 ryo kuwa 08/07/2016 rigena imicungire y’umutungo w’abashyingiranywe ,impano n’izungura ryasimbuye itegeko No. 22/99 ryo ku wa 12/11/1999,umwana wese agomba kuba afite abo akomokaho ndetse akagira uburenganzira n’inshingano by’umwana wemewe.Bamwe mu babyeyi bo mu murenge wa Gitesi mu karere ka Karongi babana batarasezeranye imbere y’amategeko, barasaba ko abana babyaye bahabwa uburenganzira ku mitungo nk’ubwabavutse ku bashingiranywe byemewe n’amategeko.

Nyirandikubwimana Marie utuye mu kagari ka Ruhinga mu murenge wa Gitesi ,aragira ati”nashakanye n’umugabo tudasezeranye mu mategeko tubyarana abana babiri, nyuma umugabo aranta yishakira undi mugore,none kuri ubu abana banjye nta burenganzira kubya Se, iwacu bahora bambwira ko ngomba kubajyana aho bavuka, nagera kwa databukwe nabo bakambwira ko nta burenganzira bafite ku isambu y’umugabo kandi sinzi aho yagiye.” Nyirandikubwimana akaba yibaza uburenganzira bw’abana be.

Undi witwa Nyiransengiyumva Adaria nawe aragira ati”nabyaranye n’umugabo abana batatu,cyakora ku bw’itegeko arabandikisha , ariko nubwo yabandikishije nta kindi ajya amfasha mubyo baba bakeneye”,ati “dore nk’ubu hari abavuye no mu ishuli”bityo kuri we akaba yifuzako n’ubwo atari umugore w’isezerano ,ariko ko bagira uburenganzira ku bya Se.

Gushishikarizwa kubandikisha

Habimana Protogène ,umunyamabanga nshingwabikorwa w’umurenge wa Gitesi,avuga ko bagenda babigisha uburyo byakorwa mu bwumvikane mu kurera abo babyaye, bakabakangurira no kubandikisha mu bitabo by’irangamimirere nk’uburenganzira bwabo. Kuri iki kibazo kandi uyu muyobozi avuga ko ibi bibazo bikunze kugaragara ku bagabo bafite ingo nyinshi, bityo hakaba hari abafatanyabikorwa bitwa inshuti z’umuryango, babafasha mu kwigisha abaturage, kuri ubu hakaba hari abana benshi bamaze kubona uburenganzira bwabo bwo kwandikwa.

Umunyamategeko Me Elie Nizeyimana asobanura ko “icyo itegeko rigena kuri bene aba bana, ari gushishikariza ababyeyi babo kubandikisha kugira ngo bemerwe, hanyuma bahite bagira uburenganzira umwana agenerwa n’umubyeyi, kuko mu gihe umwana ataremerwa ntacyo agenerwa, bityo agakangurira umubyeyi ufite iki kibazo,mu gihe bitakozwe ku neza agomba kugana inkiko umwana akemerwa .” Uyu munyamategeko kandi akomeza asobanura ko “iyo ababyeyi batandikishije umwana akiri munsi y’imyaka 18, umwana iyo yayigize afite uburenganzira bwo kwitangira ikirego cyo kwandikwa ku babyeyi”.
Ingingo ya 321 y’iri tegeko isobanura Inshingano zikomoka ku bubasha bwa kibyeyi “Ububasha bwa kibyeyi bugizwe n’inshingano yo kwita ku mwana, kumurera, gucunga umutungo we no kuwukoresha mu buryo bwubahirije amategeko”.

Ingingo ya 322 y’iri tegeko isobanura Inshingano y’ababyeyi yo kwita ku mwana wabo no kumurera “Ababyeyi bafite inshingano yo kwita no kurera umwana wabo utaragera ku myaka makumyabiri n’umwe (21) y’amavuko. Abashinzwe kurera umwana bemewe n’amategeko nabo bafite izo nshingano”.

Umutesi Marie Rose


Tanga igitecyerezo

Who are you?