Yashyizweho kuri 5 February, 2018 | 12:30

Gicumbi: Abanyeshuri begereye Uganda bagorwa n’ikinyarwanda mu ishuri

Abanyeshuli biga mu bigo by’amashuli bitandandukanye byo mu mirenge ihana imbibi n’igihugu cya Uganda bavuga ko ururimi rw’ikinyarwanda rubagora haba kurusoma no kurwandika , kuko iyo bari mu ngo bavuga urukiga. Iyo bageze ku ishuri ikinyarwanda kibabera nk’ururimi rw’amahanga.

Asiimwe Alice, yiga kukigo cy’amashuri abanza cya Mukono (EAR) mu murenge wa Cyumba uhana imbibi n’igihugu cya Uganda. Alice yakuze avuga igikiga. Ageze mu ishuri atangira kwiga kwandika no gusoma ikinyarwanda. Avuga ko gutozwa kwandika no gusoma ururimi rw’ikinyarwanda bakiri bato aribyo bizatuma batsinda neza iri somo bavuga ko ribagora. Ati’’Iyo wize gusoma ukiri muto,baguha igitabo ukabasha kugisoma,n’ibizamini ukabitsinda,iyo bitagenze gutyo birakugora.”
Mugisha Emmanuel umunyeshuri nawe uvuka muri uwo murenge avuga ko iyo bari iwabo bavuga urukiga,ikinyarwanda bakagisanga ku ishuli,bigatuma batsindwa,mu gihe babitojwe n’ababyeyi byabafasha gutsinda.Agira ati’’Iyo turi iwacu tuvuga urukiga,ababyeyi ntibadutoza gusoma no kwandika ikinyarwanda,badutoje twatsinda nk’abandi badaturiye imipaka.” Kuri Emmanuel kutagira amakuru ku kinyarwand bakiri bato bituma bagitsindwa ndetse n’andi masomo bacyigamo.

N’abarimu bigisha mu mashuri yo mu mirenge ivugwamo uru rurimishami rw’Urukiga niko babibona. Uwamahoro Jeannette,avuga ko uku kugorwa n’ikinyarwanda biterwa n’ababyeyi batakibatoza ,bakacyima umwanya. Ati ’’Ababyeyi iyo bari kumwe n’abana mu rugo,bavuga igikiga,ikinyarwanda ntibagihe umwanya,abana bagera ku ishuli bagatsindwa,kuko batagitojwe n’ababyeyi babo. "Ku ruhande rw’ababyeyi bashyirwa mu majwi n’abanyeshuri kudatoza ikinyarwanda abana babo nabo bavuga ko abenshi batazi kukivuga".

Uyu witwa Tukamuhabwa Violette,avuga ko atatoza umwana we ikinyarwanda,ngo kuko nawe ubwe,atakizi neza. ’’Ikinyarwanda kirananira kukivuga,kuko nkivuga nabi,ubwo rero sinashobora kucyigisha no kugitoza umwana,kandi nanjye ntakizi neza,icyo tuzi ni urukiga. "

Ubuyobozi bw’akarere ka Gicumbi buvuga ko bashyize imbaraga mu bukangurambaga bwo gutoza ababyeyi gukoresha ururimi rw’ikinyarwanda.
Mudaheranwa Juvenal,umuyobozi w’akarere ka Gicumbi asobanura ko’’Uburezi bwabo tubukurikirana buri munsi mu gitondo,abarezi baduha raporo y’ubwitabire,dushyiramo imbaraga mu gukangurira ababyeyi gutoza abana ikinyarwanda bagikoresha kenshi.’’

Nyirangaruye Clementine


Tanga igitecyerezo

Who are you?