Yashyizweho kuri 23 February, 2018 | 12:13

Cyumba: Guhabwa impano aho guhabwa umunani birakurura amakimbirane hagati y’ababyeyi n’abana

Mu Murenge wa Cyumba mu Ntara y’Amajyaruguru, urubyiruko ntirwifuza ko ababyeyi bakwihitiramo uwo bazaha impano y’imitungo yabo, kuko bikurura amakimbirane

mu muryango. Bifuza ko itegeko ryahindura ingingo iha ababyeyi ubwo bubasha.Nyamara babayeyi bo bakavuga ko iri tegeko ryabahaye agaciro kuko abana babihenuragaho ariko banabahoza ku keke yo kubona umunani.

Itegeko Nº27/2016 ryo ku wa 08/07/2016 risobanura ibijyanye n’impano, indagano ndetse n’izungura ku muryango nyarwanda. Iri tegeko rivuga ku birebana n’imicungire y’umutungo w’abashyingiranywe, impano n’izungura, ryemerera umubyeyi gutanga impano ku bushake kandi akayiha uwo ashaka. Abenshi mu rubyiruko rwo mu Murenge wa Cyumba mu Karere ka Gicumbi, bavuga ko amaherezo rizateza amakimbirane mu miryango.

Ndatimana Cyridion, umwe mu baturage bitabiriye ibiganiro bya PAX PRESS n’abaturage mu ishyirwa mu bikorwa ry’iryo tegeko mu Murenge wa Cyumba, yagaragaje ko ribangamiye urubyiruko cyane. Kuri we ryavugururwa, kuko ababyeyi bakiryumva, bahise baryishimira bashimangira ko ari uburenganzira bwabo bwo gutanga impano iyo ari yo yose k’uwo bashaka, n’ubwo yaba ari uwitwa rubanda. Yagize ati ”Ababyeyi batubwira ko batwishyuriye amashuri, akaba ariyo mpano batugeneye. Bati, ibyerekeye impano ku butaka n’indi mitungo y’umuryango ntibitureba.”

Sibyo gusa kuko ababyeyi basigaye bagurisha imitungo uko bashaka cyangwa bakayitanga. Urubyiruko rusanga rugiye guhura n’ibibazo bikomeye mu minsi iri mbere, birangwa n’amakimbirane mu miryango iterwa n’ububasha ababyeyi bahawe na ririya tegeko. Ibi bigarukwaho na Kankindi Emilienne, umugore ufite imyaka 30, witabiriye ibyo biganiro. Agaragaza ko agiye guhura n’ubukene bukabije kubera ko ababyeyi be bari kugurisha imitungo y’umuryango batitaye ku nyungu z’abana babo.

Uhagarariye urubyiruko mu Murenge wa Cyumba, Nsanzimana Callixte, yunganiye Kankindi Emilienne, yerekana ko ababyeyi bakimara kumva iri tegeko bahise biyumvisha ko batagifite inshingano zo guha abana babo impano harimo nk’ubutaka bwo guhinga.Yagize ati “Mu byukuri imbogamizi turacyahura nazo kubera ko ababyeyi bamwe bahise bumva ko bagiye gukoresha umutungo uko bishakiye bawuhe abo bashatse, banawukorehse uko bashatse, kuko hatakiri itegeko ribasaba guha umwana impano.”

Umunyamategeko Maître Nizeyimana Elie yasobanuriye abaturage iri tegeko byumwihariko urubyiruko, kuko arirwo rutarasobanukirwa neza icyo iri tegeko rigamije. Yerekanye impinduka rigiye kuzana mu muryango, avuga ko urubyiruko rugomba gukora cyane rutiringiye umunani uva ku babyeyi babo. Yavuze ko ababyeyi batabona amasambu yo guha abana bose babyaye, bitavuze ko umubyeyi atemerewe guha impano abana be. Nizeyimana Elie yasabye abana kubaha ababyeyi babo, kuko nabo bafite inshingano nyinshi ku bana babo nko kubaha ibibatunga, kubarihira amashuli, n’ibindi. Yibukije abaturage bitabiriye ibyo biganiro ko gupfusha ubusa umutungo w’ umuryango ari uguhemukira abana.

Umunyamabanga Nshingabikorwa w’Umurenge wa Cyumba Ndizihiwe Cyriaque ntabwo yemeranywa n’urubyiruko ruvuga ko iri tegeko rizateza amakimbirane mu miryango. Avuga ko iri tegeko rigiye gutuma urubyiruko rukura amaboko mu mufuka rugakora, kuko hari ukuntu bamwe mu urubyiruko bari bamaze kugira ikintu cy’ ubunebwe bizeye imitungo y’ababyeyi babo. Ndizihiwe yibutsa n’ababyeyi ko bagomba gufasha abana babo mu kwiteza imbere.Yakomeje avuga ko bakiri guhangana n’ingaruka zo kuba iri tegeko ritarumvikana neza yaba ku babyeyi ndetse no kubana babo.

Uko itegeko ryavugaga mbere yuko rihinduka

Ingingo ya 42 y’itegeko rya mbere yagenaga ko itangwa ry’umunani ari igikorwa ababyeyi bakora bakiriho kigamije kugabira umutungo abana babo cyangwa ababakomokaho bagahita bawegukana, bikitwa ko bashoje inshingano yo kubarera no kububakira.
Naho ingingo 43 igakomeza ivuga ko abana bose nta vangura hagati y’abahungu n’abakobwa abariho n’abahagarariye abakomoka ku bana bapfuye mbere y’ababyeyi, uretse abaciwe.

Uko ubu itegeko riteye mu ngingo ya 28 havugwa impano itanzwe mu rwego rw’umuryango ishobora gutangwa hagati y’abashyingiranywe ubwabo cyangwa hagati y’abashyingiranywe n’undi muntu cyangwa igatangwa hagati y’ababyeyi n’abana babo kuri bimwe mu bigize umutungo wabo. Iyo ababyeyi baha umwana wabo impano, babikora hadashingiwe ku ivangura hagati y’abana b’abakobwa n’abahungu.

Iyo ababyeyi baha umwana wabo impano, babikora hadashingiwe ku ivangura hagati y’abana b’abakobwa n’abahungu. Impano itanzwe mu rwego rw’umuryango ishobora gukorerwa inyandiko mpamo cyangwa inyandiko bwite cyangwa igashyikirizwa gusa nyirayo. Muri iyi ngingo, haravugwamo ko ari impano ababyeyi baha abana babo, bitandukanye n’uko byari biri mbere y’uko itegeko rivugururwa aho bawitaga umunani.

Uwizeye Carine


Tanga igitecyerezo

Who are you?