Yashyizweho kuri 1 April, 2016 | 06:26

Bamwe mu bayobozi bahinduye ibigo by’amashuri nk’iby’ubucuruzi

Gutangira umwaka w’amashuri cyangwa igihembwe cy’ishuri ni umusaraba ku babyeyi. Nta mutuzo bibaha. Ntibagorwa gusa no kwishyura amafaranga y’ishuri. Ahubwo banagowe no kwishyura isinzi ry’ibikoresho byinshi abana basabwa. Rimwe na rimwe bagategekwa ku bigura ku mashuri. Nyamara bishobora no kuva mu rugo.

Gutangira umwaka w’amashuri cyangwa igihembwe cy’ishuri ni umusaraba ku babyeyi. Nta mutuzo bibaha. Ntibagorwa gusa no kwishyura amafaranga y’ishuri. Ahubwo banagowe no kwishyura isinzi ry’ibikoresho byinshi abana basabwa. Rimwe na rimwe bagategekwa ku bigura ku mashuri. Nyamara bishobora no kuva mu rugo.

Uyu mubyeyi wo mu Karere ka Kamonyi yimyizaga imoso muri uku kwezi kwa kabiri ari nako umwaka w’amashuri watangiriyemo. Ubwo umwana umwe yari amaze kubona ishuri mu karere ka Huye yamanukanye ibihumbi mirongo irindwi. Yiteguye kwishyura make andi arenga gato ibihumbi mirongo itanu akayazana vuba ngo” agasiga n’inyandiko”. Umwana banze kumwakira bati “ishyura yose umwana ntazarya inyandiko y’ubwishyu uri busige wanditse”. Nawe ahita agarukana umwana we ati” reka mwicarane ubushobozi nimbubona nzamushakira ahandi nzayajyane yuzuye”. Kuri urwo rugendo gusa yahatakarije ibihumbi birenga icumi.

Kimwe n’uyu mubyeyi ababyeyi benshi bavunw an’itangira ry’mashuri y’abana babo cyane cyane ku bikoresho basabwa kugurira abana ku mashuri byiyongera ku mafaranga y’ishuri abana baba bagomba kwishyura. Venansiya Mukamabano w’i Karongi ati” Imyenda y’ishuri ugomba kuyigura ku ishuri kandi ntibayishyuza munsi y’ibihumbi cumi na bibiri(12 000 Frw). Hari n’aho bagutegeka imiguru ibiri y’inkweto zisa, n’amasogisi asa, kugura umukoropesho, isuka,…” Kuri uwo mubyeyi ikibazo ni uko batemera ko yanazana bimwe abikuye mu rugo ahubwo bakanabasaba kugura ibintu runaka byakorewe ahantu runaka. Ati” umukoropesho utari uwa KIAKA hari aho usanga utemewe. Bigatera kwibaza niba hatari ubucuruzi cyangwa amasezerano hagati y’abayobozi b’ibigo n’abo ibyo bikoresho bigurirwa.”

Umutwaro ukomeye uremereye ababyeyi bafite umwana urenga umwe wiga amashuri yisumbuye nubwo n’abanza nabo bitoroshye. Claude Musada wo mu mugi wa Kigali ati” Uko umwana atangiye uwa mbere ngo gura uniforme, yarangiza uwa gatatu ahandi agiye bati naho gura izindi uniforme. Byumvikane ko nk’umubyeyi ufite abana batatu barangiza ayisumbuye baguze uniforme inshuro esheshatu. N’ibindi bikoresho bitari ibyo biba bigurwa kandi buri mwaka”. Ibyo kandi ni nako bimera ku mikoropesho, impapuro (papier duplicateur),… Ibi nibyo bitera Claude kwibaza ati”Uziko ushobora gusanga ikigo gifite ububiko bw’imikoropesho ibihumbi n’ibihumbi kuko biza nk’umuhango ugomba kuzuzwa atari uko zikenewe ku rugero rungana gutyo?”

Ku bigo by’amashuri byigenga birumvikana amafaranga ahemba abarimu n’atunga abanyeshuri ni ava mu mafaranga ababyeyi bishyuye. Ariko nanone bamwe mu babyeyi banenga komite ziba zibahagarariye ko aba ari baringa kuko zitabavuganira ngo amafaranga y’ishuri ntiyongerwe uko ibigo bibyishakiye. Umwe ati” komite nyinshi ziba ziri mu kwaha k’ubuyobozi. Kuko usanga ari abadutumiza batugezaho ibyemejwe aho kutubwira bati dore twabavuganiye kuri iki. Ikindi kandi nta na hamwe wasanga hari icyagabanutse. N’iyo inama zitumijwe uba wizeye ko ari ukongera minerval, agahimbazamusyi ka mwalimu, mbese ni ibibazo gusa. Umenya hari ibindi bintu baronkeramo”. Nyamara ubundi Komite z’ababyeyi zikurikirana iby’imyigishirize mu mashuri, imitangire y’amafaranga n’ubushobozi bw’abarimu. Ariko ubu usanga hamwe na hamwe izo komite zifata ibyemezo zitagishije inama ababyeyi cyangwa n’ababyeyi ntibagire uruhare rwo kumenya ibikorerwa ku mashuri barereraho.

Muri leta hariga uwifite

Mu ntangiriro z’uyu mwaka w’amashuri wa 2016 ho byahumiye ku mirari n’amashuri ya Leta. Amashuri yo mu mijyi yongereye ku mafaranga y’ishuri yari asanzwe nibura ibihumbi 20 na ho ayo mu cyaro yongereyeho hagati y’ibihumbi umunani na 11. Abayobozi b’amashuri n’ababyeyi bavuga ko kongera amafaranga byaturutse ku cyemezo cya Minisiteri y’Uburezi (Mineduc) cyo kugabanya inkunga zayafashaga mu bikorwa bitandukanye birimo no kubagurira abana. Ubusanzwe Mineduc yishyuriraga umunyeshuri umwe amafaranga y’u Rwanda 156 ku munsi, yagenderaga mu mafunguro ye ku ishuri. Aya mafaranga yanganaga n’ibihumbi icyenda ku gihembwe.

Amakuru aturuka muri Mineduc avuga ko iki cyemezo cyo kugabanya ayo mafaranga agasigara ari 56 ku munsi, byari ukugira ngo asigaye 100 ajyanwe muri gahunda yo kugaburira ku mashuri abana bakennye biga mu mashuri y’uburezi bw’ibanze bw’imyaka icyenda na cumi n’ibiri(9 &12 YBE).
Mu ntangiro z’umwaka w’amashuri, ibigo by’amashuri byongereye amafaranga y’ishuri n’ibindi birategura inama z’ababyeyi zo kuyongera. Kongera amafaranga y’ishuri birafatwa nk’igisubizo cyo kuziba icyuho cyatewe no kugabanya bikomeye inkunga ya Mineduc ariko ku rundi ruhande bifite ingaruka ku banyeshuri baturuka mu miryango idafite ubushobozi kuko bizajya bibavutsa amahirwe yo kwiga mu mashuri abacumbikira.

Umuyobozi w’ishuri Lycee de Zaza riherereye mu ntara y’Iburasirazuba, Sr M Goretti Umugwaneza, yabwiye Rwanda Today ko ku mafaranga yakwaga umunyeshuri bongereyeho ibihumbi icyenda gusa ku banyeshuri baza mu wa Mbere no mu wa Kane, ariko bategura inama y’ababyeyi Kuwa 5 Werurwe izafata umwanzuro kuri izi nyongera muri rusange. Yagize ati“Tutabonye amafaranga, byagorana kubona ibyo abanyeshuri barya, icyemezo cya Mineduc cyaradutunguye kuko twari tutaramenyesha n’ababyeyi ko hari impinduka zishobora kuzaba ku mafaranga y’ishuri.” Muri uyu mwaka w’amashuri mu kigo cy’ishuri cya Lycee Notre Dame de Citeaux muri Kigali, amafaranga y’ishuri yavuye ku bihumbi 60 agera ku bihumbi 90, muri TTC Save mu Majyepfo yavuye kuri 68 agezwa kuri 76500, naho muri Groupe Scolaire Shyogwe ava ku bihumbi 54,300 agera ku bihumbi 65,300 nk’uko urubuga www.igihe.com rubigaragaza.

Bamwe mu babyeyi bavuga ko bahisemo gukura abana mu mashuri bigagamo kuko batabasha kubona amafaranga yo kubishyurira. Uwitwa Jerome Sebaganje w’imyaka 55 wo mu murenge wa Rugera mu Karere ka Nyabihu, ubwo yari aherekeje umwana we muri batandatu afite biga, yavuze ko atabashije kubona ibihumbi 91,100 asabwa n’ishuri yari ajyanyemo umwana. Yagize ati”By’umwihariko njye ni ikintu kinkomereye kuko umwe mu bana banjye yavuye mu ishuri ageze mu mwaka wa Gatanu w’amashuri yisumbuye, bitewe nuko ntari nkishoboye kumwishyurira.” Akomeza agira ati”Amafaranga nakomeza kwiyongera, ndumva ntazabasha gukomeza kwigisha n’uyunguyu niba Guverinoma itamfashije.” Hari aho kandi amafaranga y’ishuri yiyongereye hakajyaho n’ayo gukora indi mishinga nk’inyubako n’ibindi.
Ibi bituma hari abavuga ko imiryango ikennye itazabasha kwigisha abana babo mu mashuri abacumbikira.

Niyonagize Fulgence


Tanga igitecyerezo

Who are you?