Yashyizweho kuri 23 May, 2017 | 11:10

"Babeshywa" kuzahabwa amabati n’umuceri ngo bazatore neza

Imbuga nkoranyambaga ni kimwe mu bintu bikoreshwa cyane mu gutambutsa ubutumwa runaka. Gusa siko bwose buba ari ukuri. Nko mu karere ka Rubavu, ngo bamwe biciye muri izo mbuga batangiye kwizezwa ko nibatora "neza" bazahabwa amabati n’umuceri. Gusa ntihazwi uwatanze ubwo butumwa bwamaganirwa kure na Komisiyo y’amatora nk’igihuha.

Komisiyo y’igihugu y’amatora irasaba abaturage kwitwararika ku makuru atambuka avuga ku matora kuko hari atari ay’ukuri kandi yakwangiza amatora.
Ubu butumwa bukaba butanzwe mu gihe bamwe mu baturage bo mu karere ka Rubavu bavuga ko bumvise ko hari amabati, imiceri n’izindi mpano ziri gutangwa kugira ngo bazatore. Nyiranshuti Alphonsine ukorera ku mupaka muto uhuza Goma Gisenyi aganira n’itangazamakuru kuwa 21 Gicurasi yavuze ko ayo makuru yayumvishe ahubwo ashaka kumenya aho bitangirrwa. Agira ati « Twumva ngo hari amabati n’umuceri twagenewe n’umubyeyi wacu. Muzatubarize aho bigeze, kandi twumvise ko ngo ari ya yandi meza y’ubururu.» Undi mugenzi we nawe ati "natwe twarabyumvise. Gusa ntawe ukubwira ngo bizakorwa ryari, cyangwa bibere he? "

N’ubwo abaturage batagaragaza imvano y’aya makuru, igishyirwa mu majwi nk’inkomoko ni imbuga nkoranyambaga, izi zikaba zigerwaho n’abanyarwanda batari bake. Benshi banemeza ko igihuha kigezeho cyihuta gukwirakwizwa mu bantu benshi.

Komisiyo y’igihugu y’amatora, ivuga ko iki ari ikibazo gikunda kugaragara mu bihe byegereje amatora ndetse isaba abaturage kubyirinda nk’uko Maguru Nassoro umukozi wayo ushinzwe uburere mboneragihugu mu karere ka Rubavu abivuga. « Twe dukomeza kwigisha abaturage ko nta mpamvu yo kumva ibintu batabwiwe n’ubuyobozi. Nta nubwo kwiyamamaza biratangira ngo tuvuge ko hari n’uwaba abitangaza mu kwiyamamaza kwe. Rwose babyime agaciro.»

Kuba kandi ikoranabuhanga riri mu bikoreshwa cyane mu Rwanda, ndetse ugasanga imbuga nkoranyambaga zitabirwa n’abanyarwanda benshi, ibi ni kimwe mu byo komisiyo y’igihugu y’amatora iri gushyiramo imbaraga kugira ngo bitazarangaza abaturage mu gihe cy’amatora nk’uko Charles Munyaneza, umunyamabanga Nshingwabikorwa abitangaza. « By’umwihariko turihanangiriza abantu bose baba inkomoko y’ibihuha nk’ibi kuko uzamenyekana tuzamuhana. Turasaba abantu gutuza bagategereza igihe cyo kwiyamamaza bakumva ibyo abakandida bazaba bemejwe bazabagezaho. Gusa icyo gihe nabwo ntibyemewe kugira icyo ushukisha abaturage.»

Ikoranabuhanga ni imwe mu nzira zizakoreshwa n’abiyamamaza mu gihe cy’amatora, gusa hari impungenge ko hashobora no kuzakoreshwa ibihuha kandi abanyarwanda bakeneye amakuru y’impamo kugira ngo amatora azagende neza.

Musonera Sosthѐne


Tanga igitecyerezo

Who are you?