Yashyizweho kuri 16 May, 2016 | 12:52

Nubwo bishimira intera urwego rw’uburezi rugezeho hari n’ibyo barunenga

Mu isuzuma ry’uko abaturage babona imiyoborere ibabereye n’imitangirwe ya serivise mu nzego zibegereye (Citizen Report Card/CRC), rikorwa n’Ikigo gishinzwe Imiyoborere (RGB), abaturage bavuze uburyo babona inzego zitandukanye zifite aho zihurira n’uburezi. Ibyinshi barabishima, ariko hari ahakiri imbogamizi.

CRC ni igipimo cy’uko abaturage bishimiye serivise bahabwa ndetse n’uko bishimiye uko bayobowe. Iri suzuma rikorwa rigamije kugaragaza isura nyayo y’uko inzego z’ibanze zihagaze mu mitangire ya serivise no mu mikorere yazo hashingiwe ku byifuzo by’abaturage.

Ubu bushakashatsi bwakorewe ku ngo zigera ku bihumbi cumi na kimwe na cumi n’eshatu (11.013) mu turere twose uko ari 30, imirenge 326, imidugudu 733. Habajijwe abakuru b’ingo cyangwa abandi baba mu rugo bafite hejuru y’imyaka 18, nyuma hakorwa ibiganiro mu matsinda y’abagize JADF (Abafatanyabikorwa mu iterambere) n’abakuru ba serivisi zikorerwaho ubushakashatsi hagamijwe kurebera hamwe uko ibitanoze byanozwa.

Abaturage bishimiye uburezi ku gipimo cya 63.4%

Ubushakashatsi ku mitangire ya serivisi z’uburezi muri CRC y’umwaka wa 2015 bwerekanye ko muri rusange abaturage bishimiye imitangire ya serivisi z’uburezi ku gipimo cya 63.4%.

Uturere dutatu ari two Rubavu, Kicukiro na Ngoma ni two twagaragaje ko abaturage bishimiye serivisi z’uburezi ku gipimo kirenga 75%, naho akarere ka Ngororero kakaba ari ko kagaragaje ko abaturage bazishimiye munsi ya 50%. Naho mu tundi turere dusigaye uko ari 26, abaturage bagaragaje ko bishimiye serivisi z’uburezi ku gipimo kiri hagati ya 50% na 70%.

Muri ubu bushakashatsi abaturage bagaragaje ko bishimiye cyane inyubako z’amashuri (84.2%), isuku ku ishuri (79.2%) n’ ireme ry’uburezi. Gusa abaturage bagaragaje ko hakiri ikibazo mu bijyanye n’amashanyarazi ku mashuri, amazi ndetse no kubona ifunguro rya saa sita ku bana kuko babyishimiye ku kigero kiri munsi ya 50%.

Mu kwishimira uburezi kandi, abarenga ¾ mu babajijwe (76.5%) bavuze ko abana babo bakora urugendo ruri munsi y’ibilometero bibiri ngo bagere ku ishuri. Amashuri ngo yegerejwe abanyeshuri ku buryo abenshi badakoresha iminota irenga 30 ngo bagereyo.

Ku bijyanye n’amashuri y’incuke, ababajijwe mu turere 19 kuri 30, abagera kuri 75% bavuze ko bafite amashuri y’incuke. Muri abo harimo akarere ka Kamonyi aho bari ku gipimo cya 100%. Mu turere 10 kuri 30, abavuze ko hari amashuri y’incuke bari ku gipimo kiri munsi ya 75%. Abo bakabamo abo mu karere ka Nyabihu, aho abavuga ko hari ishuri ry’incuke bari ku gipimo cya 38.3%.

Nk’uko byagaragajwe n’ubu bushakashatsi, 1/3 cy’uturere twose tw’igihugu (uturere 10 kuri 30) ni bo gusa bishimiye bigaragara (ku kigero cya 75%) serivisi z’uburezi.

Muri rusange, habayeho impinduka igaragara mu mitangire ya serivisi n’imikorere y’inzego z’ibanze kuva aho CRC itangiye gukoreshwa mu mihigo. Igipimo cyavuye ku mpuzandengo ya 59.8% mu mwaka ushize kigera kuri 71.1% muri uyu mwaka.

Kugira ngo uyu mubare urusheho kuzamuka, ababajijwe bifuje ko habaho kugabanya ubucucike mu mashuri abanza n’ayisumbuye, kongera ibikorwaremezo birimo amazi n’amashanyarazi ku mashuri bitaragezwaho, kuzamura ireme ry’uburezi rigikemangwa, gutsura imibereho ya mwalimu no kongera amahugurwa ku myigishirize mishya.

Munyantore Jean Claude


Tanga igitecyerezo

Who are you?