Yashyizweho kuri 27 November, 2017 | 07:51

Abafite ubumuga barasaba kudahezwa kuri gahunda za VUP

Mu rwego rwo kugabanya ubucyene mu banyarwanda,Leta yagiye ishyiraho ingamba zitandukanye, zigamije gufasha abanyarwanda kwiteza imbere,zimwe muri izo gahunda ,harimo na VUP. Abo igeraho bagaragaaza ibyo yabagejejeho ariko banatanga inama ku buryo yanozwa ngo ifashe bose.

Bamwe mu bafite ubumuga bavuga ko izi gahunda batazibonamo,kuko hari abo usanga badahabwa inguzanyo zagenewe abatishoboye bitewe nuko babona bafite ubumuga,bityo bakaba babona ko batashobora kuyishyura.Ibi byavuzwe mu kiganiro ngarukamwaka umuryango w’abanyamakuru baharanira amahoro Pax Press wagiranye n’abafatanyibikorwa batandukanye ku wa 24 Ugushyingo 2017 muri Hoteli Lemigo I Kigali, ibiganiro byibanze cyane ku mikorere ya VUP.

Nyiratabaro Adonia umwe mu bafite ubumuga,avuga ko umuntu ufite ubumuga adashobora kubona inkunga ya VUP,bitewe n’icyiciro umuryango we uba urimo ,kandi nawe aba ashaka uburyo yakwiteza imbere. Ikindi ngo nuko n’ugerageje kwaka inguzanyo ngo yiteze imbere,iyo ageze kuri SACCO bayimwima bamubwira ko adashobora kuzayishyura kuko afite ubumuga. Nyamara ngo nubwo baba bafite ubumuga,imitwe yabo nayo iratekereza. Yagize ati₺ umuntu ufite ubumuga ntashobora guhabwa inguzanyo,kuko babanza kureba icyiciro urimo,iyo umuryango wawe uri mu cyiciro cya 2 cyangwa cya 3 ntibayiguha,keretse nibura umuryango wawe uri mu cyiciro cya mbere.Ikindi ni uko iyo tugiye kwaka inguzanyo ngo twiteze imbere,SACCO irazitwima ngo ntitwashobora kuzishyura kuko dufite ubumuga."

Iki kibazo kinavugwa kandi na Ndikubwimana Jean Baptiste,umuhuzabikorwa w’inama y’igihugu y’abafite ubumuga mu murenge wa Kinigi,uvuga ko ufite ubumuga adashobora no guhabwa imirimo y’amaboko muri VUP,bitewe n’ubumuga afite. Ariko ngo nubwo badafite imbaraga zo gukora iyo mirimo bitewe n’ubumuga bafite,asaba leta ko nabo bashyirirwaho imirimo bashoboye,nabo bakayikora ariko bakibona muri iyi gahunda bityo bakiteza imbere. Ati₺ umuntu ashobora kuba afite ubumuga bw’ingingo, adashobora gukora iyo mirimo y’amaboko,ariko afite umutwe utekereza wenda yashobora gukora akandi kazi,urugero ushobora kumushyira kuri depo(dépôt),akayicunga neza,ashobora kuba yakwandika ibintu runaka,twifuza ko natwe badushyiriraho izindi gahunda zidasaba imbaraga z’umubiri ,ariko natwe ufite mu mutwe hazima akahakoresha mu bindi."

Gatsinzi Justine ushinzwe iterambere ry’abatishoboye muri LODA, avuga ko abagenerwabikorwa ba VUP,batoranywa hakurikijwe icyiciro cy’imibereho y’abaturage, kandi bagatoranywa n’inzego z’ibanze zibegereye, kuba umuntu yaba afite ubumuga ntibivuga ko ashyirwa mu bahabwa inkunga y’ingoboka, ariko iyo bigaragaye ko adashoboye gukora,ari mu cyiciro cya mbere,arengeje imyaka 65,afite uburwayi budakira cyangwa se abafite ubumuga bwo mu mutwe,uyu muntu ahabwa inkunga y’ingoboka.
Naho ku kuba bakwimwa inguzanyo zo gukora imishinga yababyarira amafaranga,avuga ko nta muntu wakwimwa amafaranga yo gukora,biramutse bigaragaye ko ashobora gukora,cyeretse wenda SACCO ibonye ko adafite umushinga mwiza ,uteguye neza. Gusa ariko uyu muyobozi avuga ko hariho n’inkunga y’ingoboka igenerwa umuryango urimo umuntu ufite ubumuga kandi udashobora gukora,kugira ngo uyu muryango urusheho kumwitaho.

VUP yatangiye mu mwaka wa 2008,igamije kugabanya ubucyene bukabije abanyarwanda bari barimo, gahunda za VUP ,zibumbiye mu byiciro 3.Icyiciro cya mbere, ni igitanga inkunga y’ingoboka ku bantu batishoboye bari mu cyiciro cya mbere,abarengeje imyaka 65 badashoboye gukora,kandi batishoboye ndetse n’abafite ubumuga. Icya kabiri ni igitanga akazi k’imirimo y’amaboko ,bakanayihemberwa naho icyiciro cya 3 kikaba ari icyo gufasha abafite imishinga iciriritse ,ibafasha kwiteza imbere.
Kuva iyi gahunda yatangira kugeza ubu abangana na 16,3℅ baracyari mu bucyene bukabije naho abangana na 7,8℅ nibo bamaze kubuvamo.

Uwambayinema M.Jeanne


Tanga igitecyerezo

Who are you?